Tiyiseka Leswaku Wa Vuyela!
1 “Mawaku bulo ro tsakisa swonghasi! Ndzi fanele ndzi tsundzuka ku vuyela lahaya.” Xana u tshama u vula marito wolawo, ivi u tikuma u rivele laha munhu wa kona a tshamaka kona? Loko swi ri tano, wa swi tiva leswaku loko u ta tiyiseka leswaku wa vuyela u fanele u tsala ehansi.
2 Tsala Hinkwaswo: Loko bulo ra wena ni munhu la tsakelaka ra ha ri rintshwa emianakanyweni ya wena, tirhisa xinkarhana, u tsala hinkwaswo leswi lavekaka. Tsala vito ra munhu u tlhela u languta lexi u nga ta n’wi tsundzuka ha xona. Tsala adirese yakwe, tiyiseka leswaku u yi tsala kahle—kambisisa leswi u swi tsaleke ku vona loko swi ri swona. Tsala mhaka leyi mi buleke ha yona, matsalwa lawa mi ma hlayeke, ni buku leyi u yi fambiseke.
3 Loko u siye munhu wa kona ni xivutiso lexi xi nga ta hlamuriwa enkarhini lowu landzelaka, xi tsale ehansi. Xana u xiye swo karhi hi munhu yoloye, hi ndyangu wakwe, kumbe hi vukhongeri byakwe? Loko swi ri tano, na swona swi tsale ehansi. Kutani enkarhini lowu landzelaka, loko wo vulavula ha swona swi ta kombisa leswaku wa khathala hi yena. Xo hetelela, tsala siku ni nkarhi lowu u n’wi endzeleke ha wona ro sungula, na siku leri u nga tshembisa ku vuya ha rona. Loko u tsala hinkwaswo leswi lavekaka, swi ta ku tsundzuxa kahle, naswona a wu nge tali ku rivala leswaku u tshembise ku vuyela.—1 Tim. 1:12.
4 Loko u tsale hinkwaswo leswi lavekaka, veka phepha rolero swin’we ni leswi u swi tirhisaka ensin’wini—nkwama wa tibuku, Bibele, buku leyi nge Ku Hlamulana, na tibuku tin’wana—leswaku minkarhi hinkwayo u swi kuma ekusuhi. Swa antswa ku tsala lava nga riki kona ekaya eka phephe rin’wana ku nga ri leri u tsalelaka eka rona maendzo yo vuyela. Hambiloko wo tsala hinkwaswo leswi lavekaka leswaku u endla maendzo yo vuyela, xa nkoka ngopfu i ku tiyiseka leswaku wa vuyela!
5 Anakanya Hi Munhu Loyi U Nga Ta Vuyela Eka Yena: Loko u lunghiselela vutirheli, kambisisa phepha leri u tsaleke maendzo yo vuyela eka rona. Anakanyisisa hi munhu ha un’we, na xingheniso xa kahle lexi u nga ta xi tirhisa eka riendzo leri landzelaka. Anakanya hi ndlela leyi u nga ta yi tirhisa leswaku u endla munhu a tsakela dyondzo ya Bibele. Ku hlela hi ndlela yo tano swi ta ku pfuna ku veka mihandzu yo tala tanihi mutirheli wa mahungu lamanene, na wena n’wini u ta va ni ntsako.—Swiv. 21:5a.
6 Kutani, enkarhini lowu taka loko u kuma la rhiyaka ndleve, u nga tibyeli leswaku u ta tsundzuka ku vuyela eka yena. Ematshan’weni yo tibyela sweswo, n’wi tsale ehansi, kambisisa leswi u swi tsaleke, tshama u ri karhi u anakanya hi munhu yoloye, kutani u tiyiseka leswaku wa tlhelela!