Vutomi Bya Vanhu Byi Le Khombyeni!
1 Bibele yi swi veka erivaleni leswaku Yehovha u lava leswaku “vanhu va mixaka hinkwayo va ponisiwa.” Kambe, i ntiyiso nakambe leswaku ntshembo wa vutomi bya vanhu va tibiliyoni wu titshege hi langutelo leri va nga na rona ha Yehovha Xikwembu ni Mfumo wakwe ha Yesu Kreste. Langutelo lerinene ri nga sekeriwa ntsena eka “vutivi lebyi kongomeke bya ntiyiso.” (1 Tim. 2:3, 4) Loko hi ri karhi hi lemukisa vanhu leswaku vuhomboloki hinkwabyo byi ta kukuriwa emisaveni, leswaku ku sala misava leyintshwa ya Xikwembu ya ku lulama, hi tlhele hi lerisiwa ku endla ntirho wa nkoka lowu ponisaka vutomi.—Mat. 24:14; 28:19, 20; Rhom. 10:13-15.
2 Ha Yini Wu Ri Wa Xihatla Swonghasi? Yesu u lemukise hi “nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona.” (Mat. 24:21) Nhlomulo wolowo wu ta chaputa loko ku fika Armagedoni. (Nhlav. 16:16) Vunyingi bya vanhu lava langutaneke ni ndzoviso loko va nga yingisi mahungu lamanene byi katsa ni maxaka ya hina lama nga riki vapfumeri, vaakelani, vatirhi-kulorhi, lava hi nghenaka na vona xikolo ni vanhu lava hi va toloveleke. Kambe lexi hi karhatekeke ha xona i ku va hi fikelela “vanhu va mixaka hinkwayo,” hi encenyeta Xikwembu lexi kombiseke rirhandzu ra xona eka vanhu va le misaveni hinkwayo, hi ku nyikela hi N’wana wa xona, Yesu Kreste leswaku a va nkutsulo wa hinkwavo. (Yoh. 3:16) Hi fanele ku lwela ku rhamba vanhu hinkwavo leswaku va balekela endhawini leyi hlayisekeke ya Xikwembu. Hi ku endla ntirho wa ku chumayela hi ku hetiseka, hi nga balekela ku va ni nandzu wa ngati.—Ezek. 33:1-7; 1 Kor. 9:16.
3 Hi Xihi Xikongomelo Xa Hina? Nkoka wa ntirho wa ku chumayela wu kandziyisiwe eRitweni ra Xikwembu hinkwaro. Hilaha muapostola Pawulo a vuleke hakona, “rirhandzu leri Kreste a nga na rona ra hi susumeta” leswaku hi hanya hi ku pfumelelana ni tindlela ta Xikwembu. (2 Kor. 5:14) Ku engetela kwalaho, Xihondzo xo Rindza xi tala ku kandziyisa vutihlamuleri bya hina bya ku chumayela. Vutirheli Bya Hina Bya Mfumo byi hambeta byi hi nyika nkongomiso wa ndlela leyi hi nga endlaka ntirho wa ku chumayela ha yona. Vakulu va endla malunghiselelo ya ntirho lowu kutani va hi khutaza leswaku hi hlanganyela eka wona. Vahuweleri-kulorhi va hi rhamba leswaku hi hlanganyela na vona evutirhelini. Hi tala ku twa leswaku hi fanele ku lunghiselela swingheniso swa hina, hi fambisa timagazini ni tibuku tin’wana, hi endla maendzo yo vuyela, hi fambisa tidyondzo ta Bibele ni ku tirhisa nkarhi wun’wana ni wun’wana lowu hi pfulekelaka leswaku hi nyikela vumbhoni. Swilo leswi hinkwaswo swi hi pfuna ku hetisisa xikongomelo xa hina xa ku ponisa vutomi.—1 Kor. 9:22, 23; Efe. 1:13.