“Xana Ndzi Fanele Ku Rhurha?”

¹ Ku angula eka xileriso xa Yesu lexi nge “fambani mi ya endla vanhu va matiko hinkwawo va va vadyondzisiwa,” malandza yo tala ya Yehovha lama tinyiketeleke ma ya laha ku nga ni xilaveko lexikulu. (Mat. 28:19) Ma tekelela Pawulo, la anguleke eka xirhambo lexi nge: “Pelela eMakedoniya u ta hi pfuna.” (Mint. 16:9) Xana leswi swi nga endliwa njhani hi ndlela leyi humelelaka?

² Teka Goza Rin’we Hi Nkarhi Wun’we: Xana ku ni nsimu leyi nga tirhiwiki nkarhi hinkwawo evandlheni ra ka n’wina? Loko swi ri tano, u nga rhanga hi ku tirha tindhawu toleto. Loko u nga si endla xiboho xa ku rhurhela kun’wana, vulavurisana ni vakulu va ka n’wina ku vona loko va swi amukela leswaku u swi lunghekerile ku rhurha. U nga ha vutisa ni mulanguteri wa xifundzha xa ka n’wina loko a tiva vandlha ra le kusuhi leri u nga yaka u ya ndlandlamuxa vutirheli bya wena eka rona. Kasi loko se u anakanyisise hi swiyimo hinkwaswo, u nga ha anakanya hi ku pfuna kun’wana etikweni ra ka n’wina kumbe etikweni rin’wana. Vutirheli Bya Hina Bya Mfumo bya June 2000, byi xaxamete tindhawu leti nga ni xilaveko lexikulu. Loko u navela ku endla tano, wena ni huvo ya vakulu va ka n’wina mi fanele ku tsalela hofisi ya rhavi ya laha u tsakelaka ku ya pfuna kona, mi hlamusela xiyimo xa wena hi tlhelo ra moya. Ku nga ha va ku ri vutlhari ku endzela ndhawu yoleyo u nga si endla xiboho xa leswaku u ta rhurhela kona kumbe e-e.

³ Vana Ni Vuxiyaxiya Mayelana Ni Ku Rhurha: Vamakwerhu vo tala va rhurhela ematikweni man’wana hikwalaho ko lava mahanyelo yo antswa kumbe va lava ku panulula ejokweni ra ntshikilelo. Hi ku famba ka nkarhi, van’wana va wele emavokweni ya vanhu vo homboloka lava va tshembisaka ku va pfuna va tshamiseka etikweni lerintshwa kasi va tilavela ku va dyelela mali ya vona ivi va va tshikisa xisweswo. Xisweswo, xiyimo xa valuveri lava xi fika xi biha ku tlula loko va ri etikweni ra rikwavo. Va nga ha lava ni ku kombela vamakwerhu leswaku va va nyika vutshamo kumbe va va pfuna, hi ndlela yoleyo va hundzuka ndzhwalo eka mindyangu yin’wana ya Vakreste leyi na yona yi lwaka ni swiphiqo kumbe ku nonon’hweriwa ka yona. Swirho swin’wana swa mindyangu swi hambane ni varikwavo, leswi vangeke leswaku mindyangu yi tsana emoyeni hi ku rhurha ko tano loku nga kunguhatiwangiki kahle.—1 Tim. 6:8-11.

⁴ Loko u lava ku rhurha leswaku u ta vuyeriwa wena hi wexe, u nga rivali leswaku hambi u nga ya kwihi, ku ni swiphiqo leswi u nga ta swi kuma swi ku rindzile. Swa olova ku hlula swiphiqo swa laha u tivaka ririmi ni ndhavuko wa kona, ku ri ni ku sungula vutomi lebyintshwa endhawini leyi u nga yi tolovelangiki.