Rirhandzu Ri Hi Susumetela Ku Chumayela
1 Tanihi Timbhoni ta Yehovha, hi tiviwa swinene hi ku va vachumayeri lava hisekaka va rungula ra Mfumo. (Mat. 24:14) Emisaveni hinkwayo ku ni timbhoni leti hisekaka leti tlulaka timiliyoni ta tsevu; loko vanhu lavantshwa va hlanganyela na hina eku chumayeleni, va engeteriwa eka nhlayo leyi. Tinhlayo ti titshege hi lava va hlanganyelaka entirhweni lowu.
2 I yini lexi hi susumeteleka ku tirha hi ku tirhandzela exiavelweni lexi tlhontlhaka swonghasi? A hi sindzisiwi, a hi kokiwi hi swilo leswi vonakaka kumbe hi ku tshembisiwa swikhundlha swo hlawuleka. Eku sunguleni, vo tala va hina a hi titwa hi chava hikwalaho ko tivona hi nga faneleki kasi hakanyingi ni vanhu a va anguli hi ndlela leyinene. (Mat. 24:9) Vanhu vo tala a va xi twisisi lexi hi tiyisaka nhlana. Ku fanele ku ri ni xivangelo lexi hi susumetaka leswaku hi tiyisela.
3 Matimba Ya Rirhandzu: Yesu u kombetele eka xileriso lexi swi tlulaka hinkwaswo loko a vule leswaku hi fanele ku ‘rhandza Yehovha hi mbilu ya hina hinkwayo, moya-xiviri wa hina hinkwawo ni hi mianakanyo ya hina hinkwayo.’ (Mar. 12:30) Rirhandzu leri hi rhandzaka Yehovha ha rona ri simekiwe emintlhavekweni leyi enteke yo tlangela leswaku i mani ni leswi a nga swona—ku nga Hosi ya Vuako Hinkwabyo, Muvumbi wa swilo hinkwaswo, loyi a ‘faneriwaka hi ku amukela ku vangama ni ku xiximiwa ni matimba.’ (Nhlav. 4:11) Timfanelo ta yena to hlamarisa a ti nge ringanisiwi na nchumu.—Eks. 34:6, 7.
4 Ku tiva ni ku rhandza Yehovha swi hi susumetela ku voninga rivoni ra hina emahlweni ka vanhu. (Mat. 5:16) Rivoni ra hina ra voninga loko hi n’wi dzunisa erivaleni, hi vulavula hi mintirho ya yena yo hlamarisa naswona hi hangalasa rungula malunghana ni Mfumo wa yena. Ku fana ni ntsumi leyi hahaka empfhukeni, hi ni “mahungu lamanene lama nga heriki leswaku [hi] ma vula tanihi marungula lama tsakisaka . . . [eka] matiko hinkwawo ni tinyimba hinkwato ni tindzimi hinkwato ni vanhu hinkwavo.” (Nhlav. 14:6) Rirhandzu ra hina hi rona ri hi susumetaka entirhweni wa ku chumayela emisaveni hinkwayo.
5 Misava yi teka ku chumayela ka hina ku ri “vuphukuphuku” lebyi nga fanelangiki byi yingisiwa. (1 Kor. 1:18) Ku endliwe matshalatshala yo sivela ntirho wa hina emisaveni hinkwayo. Rirhandzu ra hina ra vutshembeki ri hi nyike xivindzi xa ku vula ku fana ni vaapostola hi ku: “A hi nge tshiki ku vulavula hi swilo leswi hi swi voneke ni leswi hi swi tweke. . . . Hi fanele ku yingisa Xikwembu tanihi mufumi ku tlula vanhu.” (Mint. 4:20; 5:29) Ku nga khathariseki ku kanetiwa, ntirho wa ku chumayela wu ya emahlweni wu andza etindhawini hinkwato ta misava.
6 Rirhandzu leri hi rhandzaka Yehovha ha rona ri fana ni ndzilo lowu pfurhaka, ri hi susumetela ku twarisa vunene bya yena hinkwako-nkwako. (Yer. 20:9; 1 Pet. 2:9) Hi ta hambeta hi ‘tivisa vanhu swiendlo swa yena hikuva u endle swilo leswikulu ngopfu’!—Esa. 12:4, 5.