Mintsombano—Nkarhi Wa Ntsako!

¹ Mintsombano ya Timbhoni ta Yehovha i minkarhi leyi tsakisaka swinene. Ku tlula dzana ra malembe, minhlangano leyi yi hoxe xandla eku andzeni loku veke kona enhlengeletanweni ya hina. Ku sukela loko ntirho lowu wu sungula, hi vone mikateko leyi fuweke ya Yehovha entirhweni wa hina emisaveni hinkwayo. Entsombanweni wa hina wo sungula wa manguva lawa, eChicago, le Illinois, hi 1893, eka vanhu va 360 lava a va ri kona, va 70 va kombise ku tinyiketela ka vona eka Yehovha hi ku khuvuriwa. Enxaxamelweni wa n’wexemu wa Mintsombano ya Muganga ya “Vaendli Va Rito ra Xikwembu” ku ve ni ntsengo lowu heleleke wa vanhu va 9 454 055, kutani ku khuvuriwa va 129 367. Xolexo i xivangelo lexikulu xa ntsako!

² Ku sukela eminkarhini ya Bibele, minhlangano ya vanhu va Xikwembu yi ve ndlela leyikulu ya ku nyika dyondzo leyi humaka eka Yehovha. Enkarhini wa Ezra na Nehemiya, vanhu a va yingisela ku hlayiwa ka nawu “ku sukela hi vurhonga ku fikela ninhlikanhi.” (Neh. 8:2, 3) Hikwalaho ka leswi vanhu va wu twisiseke ku antswa nawu enhlanganweni wolowo, a va ‘tsake ngopfu.’ (Neh. 8:8, 12) Na hina ha tsaka leswi mintsombano yi hi pfulelaka lunghelo lerinene ra ku amukela ndzetelo lowunene ni ku hi nyika swakudya swa moya “hi nkarhi lowu faneleke,” swi huma eka Yehovha hi ku tirhisa “hlonga ro tshembeka ni ro tlhariha.” (Mat. 24:45) Tanihi leswi Yesu a vuleke leswaku munhu u fanele ku hanya hi “rito rin’wana ni rin’wana leri humaka enon’wini wa Yehovha,” mintsombano i ya nkoka leswaku hi tshama hi hanye kahle emoyeni.—Mat. 4:4.

³ Matshalatshala Hinkwawo Lawa U Ma Endlaka Leswaku U Va Kona I Ya Risima: Hinkwerhu hi fanele ku tivekela pakani ya ku va kona eka Ntsombano hinkwawo wa Muganga wa nan’waka, lowu nge “Vadyondzisi Va Rito Ra Xikwembu.” Hi fanele ku kunguhata ku fika ka ha ri na nkarhi siku rin’wana ni rin’wana hi tlhela hi tshama kukondza hi hlanganyela eka “Amen,” wa xikhongelo xo pfala. Leswaku hi kota ku endla tano, swi nga ha lava leswaku hi lulamisa xiyimiso xa hina. Swi nga ha tika ku kuma nkarhi entirhweni leswaku hi ta ya entsombanweni. Hi fanele ku yima hi milenge, hi endla swilo nkarhi wa ha ri kona. Loko ku ri leswaku hi ta lava byetlelo kumbe xo famba hi xona, hi fanele ku endla malunghiselelo ka ha ri ni nkarhi. Matshalatshala hinkwawo lawa hi nga ta ma endla ma ta hi vuyerisa!

⁴ Vanhu va Yehovha a va yi pimanisi na mali mikateko leyi va yi kumaka hi ku va kona emintsombanweni. Xiya swikombiso swa van’wana lava a va tiyimisele ku va kona eNtsombanweni wa Misava Hinkwayo wa Timbhoni ta Yehovha, wa Ku Rhandza Ka Le Tilweni, lowu veke kona hi 1958 eDorobeni ra New York. Makwerhu un’wana u yimise bindzu rakwe ra ku aka ku ringana mavhiki mambirhi leswaku a ta pfuneta enhlengeletanweni a tlhela a va kona eka yona. Makwerhu wa le Swihlaleni swa Virgin u xavise nsimu ya yena ya tihekitara timbirhi hi vukulu leswaku ndyangu wa yena wa swirho swa tsevu wu ta ya hinkwawo entsombanweni. Mpatswa lowa ha riki wuntshwa wu xavise xikepe xa wona leswaku wu ta famba ni vana wa wona vanharhu enhlengeletanweni, lava nga ni malembe ya le xikarhi ka tin’hweti timbirhi ku ya eka malembe ya nkombo. Vana va munhu vanharhu va le California va byeriwe leswaku loko vo ka va nga vi kona emintirhweni ya vona, va ta kuma ku thoriwe vanhu van’wana loko va vuya. Kambe, sweswo a swi va sivelanga ku ya enhlengeletanweni yoleyo leyi nga rivalekiki.

⁵ Yehovha U Vuyerisa Matshalatshala Ya Hina Lamakulu: Yehovha u vona matshalatshala ya vanhu va yena a tlhela a ma katekisa. (Hev. 6:10) Hi xikombiso, eNhlengeletanweni leyi veke kona hi 1950 ya Ku Kula Ka Vulawuri Bya Xikwembu, lava veke kona eka yona va twe nkulumo ya nkoka swinene leyi nge “Mafambiselo Lamantshwa Ya Swilo.” Makwerhu Frederick Franz u pfuxe ku tsakela ka vayingiseri hinkwavo hi ku vutisa a ku: “Xana vanhu va matiko hinkwawo lava hlengeletaneke laha va nge swi tsakeli ku tiva leswaku madyambu ya namuntlha, exikarhi ka hina hi ni va nga ri vangani lava nga ta va tihosana emisaveni leyintshwa?” Endzhaku ka malembe ya 50, nhlamuselo ya Pisalema 45:16, leyi yi vekiweke erivaleni ya ha hi tsakisa ni sweswi.

⁶ Endzhaku ka ku va kona entsombanweni wa muganga wa n’wexemu, nhloko ya ndyangu wun’wana lowu tlangelaka yi tsale leswi landzelaka: “Vamakwerhu, ntsombano wu ve lowu ponisaka vutomi bya hina hi ndlela leyi hlamarisaka. Ndyangu wa mina wu rhurhele edorobeni hikwalaho ka ntirho, kovaloko hi hoxe vumoya bya hina ekhombyeni. . . . Hi honise vutihlamuleri bya hina bya Vukreste. Hi tshike ni ku va kona eminhlanganweni ni le ku hlanganyeleni evutirhelini hilaha ku heleleke. . . . Ntsombano lowu wu pfuxe matimba ya hina kutani hi tlhele hi tivekela tipakani ta moya ni ku hleleka leswaku hi kota ku ti fikelela.”

⁷ Yehovha u hi nyika swakudya swa moya leswi hi swi lavaka. U hi lunghiselela tafula ra swakudya leswi fuweke, emintsombanweni ya hina. Ku tlangela ka hina lunghiselelo leri ku fanele ku endla leswaku hi vula leswi vuriweke hi Korneliyo loko a endzeriwe hi muapostola Petro: “Enkarhini lowu hinkwerhu hi kona emahlweni ka Xikwembu leswaku hi ta twa swilo hinkwaswo leswi Yehovha a ku leriseke leswaku u swi vula.” (Mint. 10:33) A hi tivekeleni pakani ya ‘ku va kona emahlweni ka Xikwembu’ enongonokweni hinkwawo wa Ntsombano wa Muganga wa nan’waka wa “Vadyondzisi Va Rito Ra Xikwembu” naswona hi tsaka!