Andzisa Ntsako Wa Wena Eku Chumayeleni
1 Ntsako wa ku chumayela mahungu lamanene—xana wa wu kuma evutirhelini bya wena? Loko hi nga swi xiyi, misava leyo homboloka leyi hi hanyaka eka yona yi nga endla leswaku hi chava ku chumayela, kutani hi lahlekeriwa hi ntsako wa hina. Nakambe ku tirha ensin’wini ya vanhu lava omeke tinhloko ku nga hi heta matimba. Hi wahi magoza lama pfunaka lawa hi nga ma tekaka leswaku hi andzisa ntsako wa hina eku chumayeleni?
2 Vana Ni Langutelo Lerinene: Swa pfuna swinene ku va ni langutelo lerinene. Ndlela yin’wana leyi hi nga vaka ni langutelo lerinene ha yona i ku anakanyisisa hi lunghelo ro hlawuleka leri hi nga na rona ra ku va “vatirhi-kulobye ni Xikwembu.” (1 Kor. 3:9) Yesu na yena u na hina loko hi ri karhi hi hetisisa ntirho lowu. (Mat. 28:20) Naswona u hi seketela hi vuthu ra tintsumi. (Mat. 13:41, 49) Kutani ha tiyiseka leswaku matshalatshala ya hina ma kongomisiwa hi Xikwembu. (Nhlav. 14:6, 7) Hikwalaho, ku nga khathariseki leswaku vanhu van’wana va angurisa ku yini entirhweni wa hina, hi tsakisiwa swinene hi ndlela leyi lava nga etilweni va angulaka ha yona!
3 Lunghiselela Kahle: Ku lunghiselela kahle na kona ku hi tisela ntsako. A swi fanelanga swi va ntirho lowukulu ku tilunghiselela ku ya ensin’wini. Swi teka timinete ti nga ri tingani ku languta yinhla leyi u nga vulavulaka ha yona, eka timagazini ta sweswinyana kumbe eka minkandziyiso leyi fambisiwaka en’hwetini yoleyo. Hlawula xingheniso eka nhloko-mhaka leyi nge “Leswi U Nga Swi Vulaka Hi Timagazini,” eka Vutirheli Bya Hina Bya Mfumo. Kamba ni xiengetelo xa January 2002, eka nhloko-mhaka leyi nge “Swingheniso Leswi Ringanyeteriweke Ntirho Wa Le Nsin’wini” kumbe u kuma xingheniso lexi humelelaka ebukwini leyi nge Ku Hlamulana. Loko maangulelo lawa vini va miti va toloveleke ku angula ha wona ma ku khomisa xo tika, lunghiselela nhlamulo leyi nga ta xixima leswi va swi vuleke kambe yi yisa nyingiso emhakeni leyi pfuxaka ku tsakela. Buku leyi nge Ku Hlamulana yi ta ku pfuna swinene emhakeni leyi. Hi ku tirhisa swipfuno leswi, hi ta va ni xivindzi lexi lavekaka leswaku hi chumayela hi tsakile.
4 Khongela Hi Mbilu Hinkwayo: Xikhongelo i xa nkoka leswaku hi tshama hi tsakile. Leswi hi endlaka ntirho wa Yehovha, hi fanele ku kombela moya wa yena, lowu mbhandzu wun’wana wa wona ku nga ntsako. (Gal. 5:22) Yehovha u ta hi nyika matimba ya leswaku hi hambeta hi chumayela. (Filp. 4:13) Ku khongelela vutirheli bya hina swi ta hi pfuna leswaku hi va ni langutelo lerinene loko hi langutana ni swiyimo leswi nga dyisiki byi rhelela. (Mint. 13:52; 1 Pet. 4:13, 14) Loko hi titwa hi chava, xikhongelo xi ta hi pfuna leswaku hi phikelela hi xivindzi ni hi ntsako.—Mint. 4:31.
5 Pfula Tindlela: Ku vula ntiyiso, vutirheli bya hina byi tsakisa swinene loko hi kota ku kuma vanhu kutani hi va chumayela. Ku cinca xiyimiso xa wena leswaku u tirhisa nkarhi wun’wana ku endzela vanhu hi yindlu ni yindlu, kumbexana loko se ri rhengile kumbe nimadyambu, swi endla leswaku ku va ni vuyelo lebyinene. Nkarhi wun’wana ni wun’wana loko u famba exitarateni, u ya exitolo, u khandziya bazi kumbe u ri eku tiololeni ephakeni, u hlangana ni vanhu. Ha yini u nga lunghiseleli marito yo koma yo pfuxa bulo u tlhela u teka goza ra ku tshinelela vanhu lava vonakaka va ri ni vunghana? Swi nga ha endlaka leswaku wa tirha kumbe u nghena xikolo laha u vulavulaka ni vanhu siku ni siku. U nga pfulekeriwa hi nkarhi wa ku chumayela hi ku pfuxa mhaka ya Matsalwa leyi nga endlaka leswaku munhu a tsakela. Swiringanyeto leswinene swi kumeka eka tluka ro sungula ra xiengetelo xa Vutirheli Bya Hina Bya Mfumo bya January 2002. Matshalatshala man’wana ni man’wana eka lawa, ma nga andzisa ntsako wa munhu eku chumayeleni.
6 Leswi ntsako wu hi pfunaka leswaku hi tiyisela, i swa nkoka leswaku hi tshama hi tsakile! Hi ku endla tano, hi ta kuma hakelo leyikulu loko ntirho lowu nga taka wu nga ha engetiwi wu fika emakumu ya wona. Ntshembo wolowo hi woxe wu nga andzisa ntsako wa hina eku chumayeleni.—Mat. 25:21.