“Tirhela Yehovha Hi Ku Tsaka”
1. Xana i yini lexi nga endlaka malandza ya Yehovha ma kuma ntsako lowukulu?
1 Muapostola Pawulo, u tsarile a ku: “Nkarhi hinkwawo tsakani eHosini. Nakambe ndzi ri, Tsakani!” (Filp. 4:4) Lunghelo ro chumayela mahungu lamanene ni ku pfuna vanhu lava fanaka ni tinyimpfu leswaku va gandzela Yehovha ri tisa ntsako lowukulu. (Luka 10:17; Mint. 15:3; 1 Tes. 2:19) Loko minkarhi yin’wana ntsako hi nga wu kumi entirhweni wa hina wo chumayela, xana hi nga endla yini?
2. Xana ku tshama hi ri karhi hi tsundzuka leswaku hi rhumiwe hi mani, swi nga wu engetela njhani ntsako wa hina?
2 Ntirho Lowu Humaka Eka Xikwembu: Tsundzuka leswaku ntirho wa hina wo chumayela wu huma eka Yehovha. Ina, i lunghelo lerikulu ku va “vatirhi-kulobye ni Xikwembu” eku chumayeleni ka rungula ra Mfumo ni ku endla vadyondzisiwa! (1 Kor. 3:9) Kreste Yesu u na hina eka ntirho lowu, lowu nga ta ka wu nga endliwi nakambe. (Mat. 28:18-20) Tintsumi na tona ta katseka swinene naswona ti tirha na hina entirhweni lowukulu wo tshovela hi tlhelo ra moya, lowu wu endliwaka sweswi. (Mint. 8:26; Nhlav. 14:6) Matsalwa swin’we ni mintokoto ya vanhu va Xikwembu, swi nyikela vumbhoni lebyi nga kanakanisiki bya leswaku Yehovha wa wu seketela ntirho lowu. Hikokwalaho, loko hi chumayela hi ya eka vanhu tanihi lava “rhumiweke hi Xikwembu, hi voniwa hi Xikwembu, swin’we na Kreste.” (2 Kor. 2:17) Leswi swi fanele swi hi tsakisa swinene!
3. Xana xikhongelo i xa nkoka ku fikela kwihi leswaku hi kuma ntsako entirhweni wa Xikwembu?
3 Xikhongelo i xa nkoka loko hi lava ku tshama hi tsakile entirhweni wa Xikwembu. (Gal. 5:22) Leswi ntirho wa Xikwembu hi nga wu endlaka ntsena hi matimba ya xona, hi fanele hi kombela moya wa xona, lowu hi musa xi wu nyikaka lava va wu kombelaka. (Luka 11:13; 2 Kor. 4:1, 7; Efe. 6:18-20) Ku khongela malunghana ni ntirho wa hina wo chumayela swi ta hi pfuna leswaku hi tshama hi ri ni vonelo lerinene loko hi hlangana ni vanhu lava va nga tsakeliki. Swi ta hi pfuna leswaku hi hambeta hi chumayela hi xivindzi, hi tsakile.—Mint. 4:29-31; 5:40-42; 13:50-52.
4. Xana ku lunghiselela kahle swi hi pfuna njhani leswaku hi kuma ntsako lowu engetelekeke loko hi chumayela, naswona hi tihi tindlela leti tirhaka leti hi nga lunghiselelaka ku ti tirhisa?
4 Lunghiselela Kahle: Ndlela leyinene yo kuma ntsako lowu engetelekeke loko hi ri entirhweni wo chumayela i ku lunghiselela kahle. (1 Pet. 3:15) Ku lunghiselela ko tano a ku fanelanga ku dya nkarhi wo tala. A swi teki nkarhi wo tala ku pfuxeta swingheniso leswi ringanyetiweke swo fambisa magazini wa sweswi kumbe xingheniso lexi fanelaka nkandziyiso lowu u lavaka ku wu fambisa. Leswaku u kuma xingheniso lexi fanelekaka, u nga tirhisa buku leyi nge Ku Hlamulana kumbe minkandziyiso ya nkarhi lowu hundzeke ya Vutirheli Bya Hina Bya Mfumo. Vahuweleri van’wana va Mfumo va swi kuma swi pfuna ku tsala xingheniso xo koma exiphephanini. Loko va vulavula va pfa va languta xiphephana lexi leswaku va ta tsundzuka tinhla leti va lavaka ku ti vula. Leswi swi va endla leswaku va nga chavi naswona swi va nyika xivindzi xo vulavula.
5. Xana ntsako wu hi vuyerisa njhani hina ni van’wana?
5 Ntsako wu tisa mikateko yo tala. Loko hi languteka hi tsakile hi endla leswaku rungula ra hina ri rhandzeka. Ntsako wu endla leswaku hi kota ku tiyisela. (Neh. 8:10; Hev. 12:2) Ku tlula kwalaho, ntirho wa hina lowu hi wu endlaka hi tsakile wu kwetsimisa Yehovha. Hikokwalaho, a hi ‘tirheleni Yehovha hi ku tsaka.’—Ps. 100:2.