Ku Hlengeletiwa Ka Vanhu Va Tindzimi Hinkwato

¹ Rito ra Xikwembu ra hetiseka! Vanhu “lava humaka eka tindzimi hinkwato ta matiko” va amukela vugandzeri bya ntiyiso. (Zak. 8:23) Xana Timbhoni ta Yehovha ti va pfuna njhani vanhu va ‘tinyimba hinkwato ni va tindzimi hinkwato’ leswaku va va ni vuxaka lebyinene na Yehovha, leswaku va kota ku pona “enhlomulweni lowukulu”?—Nhlav. 7:9, 14.

² Leswi Nhlengeletano Ya Xikwembu Yi Swi Endleke: Huvo leyi Fumaka yi lunghiselele minkandziyiso ya Bibele leyi kumekaka hi tindzimi ta kwalomu ka 380 leswaku vanhu emisaveni hinkwayo va ta wu twisisa kahle nkoka wa mahungu lamanene. Ku lunghiselela ni ku kandziyisa minkandziyiso yoleyo hi tindzimi to tala i ntirho lowukulu ngopfu. Swi katsa ku hlela mintlawa ya vahundzuluxeri lava fanelekaka ni ku va nyika mpfuno lowu va wu lavaka leswaku va hundzuluxela minkandziyiso ya hina hi tindzimi leti hinkwato, kun’we ni ku yi kandziyisa, ivi yi rhumeriwa etindhawini to hambana-hambana. Kambe ntirho lowukulu wu endliwa hi vahuweleri va Mfumo, lava tekaka rungula ra Bibele leri ponisaka vutomi, va ri yisa evanhwini.

³ Ku Hlangavetana Ni Ntlhontlho: Ensin’wini ya hina ku ni vanhu vo tala lava vulavulaka tindzimi timbe ni ta laha kaya. Leswaku vanhu lava va fikeleriwa hi mahungu lamanene, malandza ya Xikwembu lama engetelekeke ma endla matshalatshala yo dyondza tindzimi leti tolovelekeke ematikweni ya wona. Van’wana va dyondza Ririmi ra Mavoko. Ensin’wini leyi nga hansi ka rhavi ra Afrika Dzonga ku ni mavandlha ya kwalomu ka 1 360 ni mintlawa leyi chumayelaka hi tindzimi ta kwalomu ka 11. Vanhu van’wana lava a va nga si tshama va twa hi ta Yehovha kumbe lava a va nga tivi nchumu hi Bibele va amukela ntiyiso wa Rito ra Xikwembu.—Rhom. 15:21.

⁴ Xana hi nga endla matshalatshala lama engetelekeke yo chumayela mahungu lamanene eka vanhu vo huma ematikweni mambe lava kumekaka ensin’wini ya ka hina? (Kol. 1:25) Mavandlha yo tala ma hlela ntirho wo chumayela eka vanhu lava vulavulaka ririmi rimbe lava nga ensin’wini ya wona. Vahuweleri lava va rhanga hi ku dyondza xingheniso xo olova, xo tanihi lexi nge: “A hi loseni. Ndzi ku khomele mahungu lamanene. [Kutani a nyika n’wini wa muti xiphephana kumbe broxara leyi kumekaka hi ririmi rolero.] Sala kahle.” Hakunene Yehovha wa ma katekisa matshalatshala wolawo lamatsongo!

⁵ Rungula ra Mfumo ri khumba vanhu va swiyimo ni tindzimi hinkwato. A hi tirhiseni nkarhi lowu hi pfulekelaka leswaku hi va tivisa rungula leri.