Nongonoko Lowuntshwa Wa Nhlengeletano Ya Xifundzha

¹ Hi fanele hi tshemba Yehovha leswaku hi tshama hi tiyile eripfumelweni emisaveni leyi xiyimo xa yona xi cincaka. Xana sweswo hi nga swi kombisa njhani hi ku kongoma evuton’wini bya hina? Xana ku tshemba Yehovha ku byi khumbisa ku yini vutomi bya hina ni bya mindyangu ya hina? Swi hi pfuna njhani leswaku hi lwisana ni nhlohlotelo wa misava ya Sathana? Nongonoko wa nhlengeletano ya xifundzha ya lembe ra ntirho ra 2003 wu hlamula swivutiso leswi. Nhloko-mhaka ya kona yi ri “Tshemba Yehovha, U Endla Leswinene.”—Ps. 37:3.

² A hi fanelanga hi tshemba Yehovha hi minkarhi yo hlawuleka kumbe ya maxangu ntsena. Hi fanele hi n’wi tshemba minkarhi hinkwayo. Leswi swi kandziyisiwa hi nkulumo yo sungula leyi nge “Tshemba Yehovha Minkarhi Hinkwayo.” (Ps. 62:8) Nkulumo yo siyerisana leyi nga ni swiyenge swa mune leyi nge “Ku Kombisa Ku Tshemba Yehovha,” yi ta hi komba ndlela leyi hi nga ri kumaka ha yona rungula leri sekeriweke eBibeleni, leri nga ta hi pfuna ku aka vukati lebyi humelelaka, ku langutana ni swiphiqo leswi vaka kona endyangwini ni ku enerisa swilaveko swa hina swa nyama.

³ Misava ya Sathana yi ringeta ku byala vonelo leri soholokeke eka hina, malunghana ni ku hambanisa leswinene ni leswo biha naswona yi ringeta ku hi hlanganisa nhloko leswaku hi nga tivi leswaku swa nkoka ni leswi nga riki swa nkoka hi swihi. (Esa. 5:20) Nkulumo leyi nge “Tivonele Eka Swilo Leswi Nga Riki Swa Nkoka eVuton’wini” ni leyi nge “Balekelani Swo Biha—Mi Endla Leswinene” ti ta hi pfuna leswaku hi yi namarhela swinene mimpimanyeto ya Yehovha leyi tlakukeke.—Amo. 5:14.

⁴ Loko Yehovha a herisa mafambiselo lawa yo homboloka ya swilo, malandza ya Xikwembu ma ta boheka ku tshemba yena hi ku helela. Leswi swi kandziyisiwa hi nkulumo ya le rivaleni leyi nge “Ku Kutsuriwa eMaxangwini Ya Misava Ku Tshinele.” Endzhaku ka sweswo, un’wana ni un’wana wa hina u ta khutaziwa leswaku a tikambela eka nkulumo leyi nge “Xana U Ta Vuriwa La Lulameriwaka Hi Mfumo Wa Xikwembu?” Nongonoko lowu wu gimeta hi xikhutazo lexi nge “Tiyiseka Hi Switshembiso Swa Yehovha.”

⁵ Eka nhlengeletano yin’wana ni yin’wana nkulumo ya nkhuvulo i ya nkoka swinene. Un’wana ni un’wana la lavaka ku khuvuriwa u fanele a byela mulanguteri la ungamelaka hi ku hatlisa leswaku ku endliwa malunghiselelo lama faneleke.

⁶ Eminkarhini leyi hundzukaka, Yehovha hi yena ntsena xihlovo xa ntiyiso xa ntshembo ni matimba. (Ps. 118:8, 9) Onge hinkwerhu ka hina hi nga kuma matimba lama engetelekeke yo tshemba yena hi ku va kona eka nongonoko hinkwawo wa nhlengeletano ya xifundzha.