Nongonoko Lowuntshwa Wa Nhlengeletano Yo Hlawuleka Ya Siku Rin’we
1 Hambiloko swihaxa-mahungu ni vadyondzisi va misava va dzunisa rifuwo ra swilo leswi vonakaka, Rito ra Xikwembu ri ri ‘Mi Va Lava Fuweke Hi Mintirho Leyinene.’ (1 Tim. 6:18) Yoleyo i nhloko-mhaka ya nongonoko wa nhlengeletano yo hlawuleka ya siku rin’we, ku sukela hi September 2002. Hi xihi xikhutazo lexi hi nga ta xi kuma enhlengeletanweni leyi?
2 Mulanguteri wa xifundzha u ta hlamusela leswi swi vulaka swona ‘Ku Va Lava Fuweke Hi Ku Ya Hi Langutelo Ra Xikwembu,’ naswona u ta vulavurisana ni van’wana lava lwelaka ku kuma rifuwo ra moya. Eka nkulumo ya xona yo sungula, xivulavuri lexi endzeke xi ta kombisa ndlela leyi vanhu va Xikwembu va yi endlaka ha yona “Mintirho Leyinene eNkarhini Lowu Wa Ntshovelo.” Un’wana ni un’wana wa hina u ta tsundzuxiwa leswaku a nga endla yini leswaku a hlanganyela swinene entirhweni wa Xikwembu wo tshovela lowu endliwaka namuntlha.
3 Swa hi tsakisa swinene loko hi vona vantshwa lava nga Vakreste va lwela ku kuma rifuwo ra moya! Sweswo swi yisa ku dzuneka eka Yehovha naswona swi pfulela vantshwa ndlela yo kuma malunghelo enkarhini lowu taka. Nkulumo leyi nge “Ku Bumabumela Vantshwa Hi Mintirho Leyinene Leyi Dzunisaka Yehovha” yi ta kombisa mintirho leyinene leyi endliweke hi vantshwa lava nga Vakreste lava nga exifundzheni.
4 Hi byihi vuyelo bya ku lwela ku endla mintirho leyinene? Sweswo swi ta hlamuseriwa hi xivulavuri lexi endzeke eka nkulumo ya xona yo gimeta leyi nge, “Hambeta U Endla Mintirho Leyinene Kutani U Kuma Mikateko Ya Yehovha.” Xi ta hlamusela ndlela leyi hi nga kumaka mikateko leyi fuweke ha yona: (1) tanihi munhu ha un’we, (2) tanihi mindyangu, (3) tanihi vandlha ni (4) nhlengeletano ya misava hinkwayo.
5 Lava va tinyiketeleke eka Yehovha va ta va ni lunghelo ra ku khuvuriwa. Loko u tiyimisele ku teka goza rero, namba u tivisa mulanguteri la ungamelaka.
6 Loko ku tivisiwa siku leri nhlengeletano ya ka n’wina yi nga ta khomiwa ha rona, hatlisa u endla malunghiselelo ya ku ya kona. Ringeta ku fika ka ha ri ni nkarhi leswaku u ta hlanganyela eka risimu ro pfula ni xikhongelo. Ku va kona ni ku yingiserisisa eka nongonoko hinkwawo wa nhlengeletano yo hlawuleka ya siku rin’we swi ta hi nyika matimba ya ku hambeta hi famba hi ndlela leyi hi fuwisaka hakunene hi ku ya hi langutelo ra Yehovha Xikwembu xa hina.