Papalata Ku Hlongorisa “Swilo Leswi Nga Pfuniki Nchumu”
1 Ndlela yin’wana leyikulu ya ku vulavurisana namuntlha i ku tirhisa E-mail. Hambileswi swi nga vaka swi fanerile ku avelana mintokoto ni timhaka tin’wana ni va ndyangu ni vanghana hi ku tirhisa E-mail, hi swihi “swilo leswi nga pfuniki nchumu” leswi nga ha katsekaka loko hi yi tirhisa hi ndlela yo biha?—Swiv. 12:11.
2 Switsundzuxo Malunghana Ni Ku Tirhisa E-Mail: Van’wana va titwa va kume ndlela yo antswa ya ku vulavurisana ni nhlengeletano ya Yehovha loko va kuma rungula ra E-mail leri va anakanyaka leswaku ra ha hisa. Leswi swi nga ha katsa mintokoto, swiendlakalo swa le Bethele, swiviko swa makhombo kumbe minxaniso hambi ku ri rungula ra xihundla leri tivisiweke eSwikolweni swa Vutirheli bya Mfumo. Van’wana va vonaka va hisekela ku haxa marungula yo tano, va lava leswaku va va vo sungula ku paluxa rungula rero eka vanghana va vona.
3 Minkarhi yin’wana, rungula ni mintokoto ya kona swi va swi soholotiwile kumbe swi cheriwa munyu. Kumbe rungula ra kona ri hundzise mhaka leyi nga riki yona hileswi vahundzisi van’wana va rona va laveke leswaku ri dikida vanhu makhehele. Vanhu lava tsutsumelaka ku haxa timhaka to tano hakanyingi va ti kuma ti nga si vupfa kahle. (Swiv. 29:20) Minkarhi yin’wana, hambiloko mhaka ya kona yi ri mavunwa, yi hundziseriwa ku tsakisa van’wana ntsena. Swiviko swo tano leswi nga riki ntiyiso kumbe leswi hambukisaka swi wela eka “timhaka ta mavunwa,” leti nga kombisiki xichavo eka Xikwembu.—1 Tim. 4:6, 7.
4 Loko u rhumela rungula leri kumekaka ri hoxile, u ta rhwala vutihlamuleri lebyikulu bya gome kumbe hasahasa leyi nga vangiwaka hi rungula leri. Loko Davhida a kuma xiviko lexi hundzeletiweke xa leswaku vana va yena va majaha va dlayiwe hinkwavo, u ‘handzule swiambalo swa yena hi le xikarhi’ hikwalaho ka gome. Hambiswiritano, kahle-kahle a ku dlayiwe n’wana un’we ntsena. Hakunene sweswo a swi khomisa gome, kambe ku hundzeletiwa ka mhaka leyi ku nyanyise gome leri Davhida a a ri na rona. (2 Sam. 13:30-33) Entiyisweni a hi fanelanga hi endla nchumu wihi ni wihi lowu nga kanganyisaka vamakwerhu kumbe wu va heta matimba.
5 Ntlawa Lowu Vekiweke Hi Xikwembu: Tsundzuka leswaku Tata wa hina wa le tilweni u veke ntlawa lowu hundzisaka rungula rakwe, ku nga “hlonga ro tshembeka ni ro tlhariha.” “Hlonga” leri ri ni vutihlamuleri bya ku kambisisa leswaku hi rihi rungula leri faneleke ri kumiwa hi va ndyangu wa vapfumeri, ni ku kumisisa “nkarhi lowu faneleke” wa ku ri hangalasa. Swakudya leswi swa moya swi kumiwa ntsena hi ku tirhisa nhlengeletano ya le tilweni. Minkarhi hinkwayo hi fanele hi titshega hi ntlawa lowu hlawuriweke hi Xikwembu leswaku wu hundzisa rungula leri tshembekaka, ku nga ri ku titshega hi vatirhisi va Internet.—Mat. 24:45.
6 Ndhawu Yo Veka Rungula Eka Internet: Hi ni ndhawu leyi nga enawini yo veka rungula eka Internet: www.watchtower.org. Leyi i ndhawu leyi eneleke yo nghenisa rungula leri vanhu va nga ri lavaka. A ku na xilaveko xa leswaku munhu, komiti kumbe vandlha ro karhi ri tiendlela ndhawu ya rona yo veka rungula eka Internet malunghana ni Timbhoni ta Yehovha. Van’wana va nghenise rungula ra minkandziyiso ya hina va tlhela va tshaha matsalwa hinkwawo ni rungula ra swikombo, naswona va nyike vanhu rungula ra ntsombano hi ku koxa minyikelo. Ku nga khathariseki leswaku ha vuyeriwa kumbe e-e, mukhuva wa ku kopa rungula ra minkandziyiso ya Watchtower ivi u ri hangalasa wu lwisana ni milawu leyi sivelaka ku kopa rungula. Hambileswi van’wana va nga anakanyaka leswaku va pfuna vamakwerhu, sweswo a swi amukeleki naswona swi fanele swi tshikiwa.
7 Ku va ni vuxiyaxiya ni ku hluteka emianakanyweni loko hi tirhisa E-mail, swi ta komba leswaku mianakanyo ya hina yi tele hi ‘swilo swa risima ni leswi tsakisaka.’—Swiv. 24:4.