Ku Vuyeriwa Hi Xitalo Eka Ntsombano Wa Muganga Wa “Vachumayeri Va Mfumo Lava Hisekaka”
1 Nongonoko Lowu Khutazaka: Hi ve ni nongonoko lowu khutazaka swinene entsombanweni wa muganga lowa ha ku hundzaka! Hinkwerhu a hi hlengeletane hi xikongomelo xin’we, xa ku lotiwa swinene leswaku hi chumayela Mfumo wa Xikwembu hi ku hiseka. Xana wa ha yi tsundzuka ndlela leyi xivulavuri xo sungula xi xi hlamuseleke ha yona xiga lexi nge “ku chumayela”? Xana wa wu tsundzuka ndzavisiso lowu nkulumo leyi nge “Hi Nga Chaveni Tanihi Leswi Hi Tivaka Leswaku Yehovha U Na Hina” yi hi khutazeke ku wu endla? Hi tihi timhaka ta vutomi leti u ti kambisiseke ku fikela sweswi?
2 Nkulumo yo siyerisana leyi nge “Ku Tiya Ka Ripfumelo Ra Hina Ku Ringiwa Hi Tindlela To Hambana-hambana” yi hi nyike swivangelo-nkulu swinharhu swa mhaka leyi Yehovha a pfumelelaka ku xaniseka ha yona. Xana u nga swi hlamusela? Hi xihi xivangelo xa Matsalwa eka hina Vakreste xa leswaku hi va ni vukala-tlhelo? Xana hi khutaziwe ku endla yini leswaku hi lunghekela ku langutana ni mintlhontlho leyi tisiwaka hi xiyimo xa hina xa vukala-tlhelo? Xana ku tiyisela ka hina miringo hi ku tshembeka swi dzunisa Yehovha hi ndlela yihi?
3 Eka drama leyi nge “Yima U Tiya eMinkarhini Ya Maxangu,” hi swihi swivono leswi ku tiyiseke swinene? Xana hi nga fana na Yeremiya hi ndlela yihi?
4 Nkulumo ya le rivaleni leyi nge “Xiyimo Xa Misava Leyi Xa Hundzuka,” yi hlamusele ku hundzuka kwihi lokukulu loku taka, loku yisaka eka siku ra Xikwembu leri chavisaka? Loko u ri karhi u yingisela nkulumo yo gimeta, leyi nge “Vanani Lava Fuweke eMintirhweni Leyinene Tanihi Vachumayeri Va Mfumo Lava Hisekaka,” xana u vone rungula ra kona ri byi khumba njhani vutirheli bya wena?
5 Tinhla-nkulu Leti Hi Faneleke Hi Ti Tirhisa: Hilaha swi hlamuseriweke hakona eka nkulumo leyi nge “Kombisani Moya Wa Ku Nkhensa,” xana hi nga yi kombisa njhani ndlela leyi hi n’wi tlangelaka ha yona Yehovha? Eka nkulumo-nkulu leyi nge “Vachumayeri Va Mfumo Va Tirha Hi Ku Hiseka,” xana hi khutaziwe ku tekelela ku hiseka ka mani? Xana hi komberiwe ku tikambisisa hi ndlela yihi?
6 Nkulumo yo siyerisana leyi nge, “Vuprofeta Bya Mikiya Bya Hi Tiyisa Leswaku Hi Famba Hi Vito Ra Yehovha,” yi kandziyise timfanelo tihi tinharhu leti hi faneleke hi ti fikelela leswaku hi amukeriwa hi Yehovha? Xana swa koteka ku ti fikelela? (Mik. 6:8) Hi ku ya hi nkulumo leyi nge “Tshama U Tengile eMahanyelweni Hi Ku Hlayisa Mbilu Ya Wena,” xana hi fanele ku tshama hi tengile emahanyelweni hi tindlela tihi? Nkulumo leyi nge, “Papalata Vuxisi” yi hi lemukise etimhakeni tihi leswaku hi nga kanganyisiwi naswona hi nga kanganyisi van’wana?
7 Hi tihi tinhla leti pfunaka leti nyikeriweke eka nkulumo yo siyerisana leyi nge, “Vachumayeri Va Mfumo Lava Vangamisaka Vutirheli Bya Vona,” leti u sunguleke ku ti tirhisa evutirhelini bya wena? Enkulumeni leyi nge “Ku Vulavula Hi Timhaka Ta Mfumo Swa Aka,” ku kambisisiwe tsalwa ra Vafilipiya 4:8. Xana tsalwa leri ri hi pfuna njhani leswaku hi ringeta ku vulavula ngopfu hi timhaka ta moya, naswona hi fanele hi swi endla rini sweswo?
8 Nkulumo leyi nge, “Tshemba Yehovha Hi Ku Helela eMinkarhini Ya Maxangu,” yi hlamusele ndlela leyi hi nga langutanaka ha yona ni timhangu, swiphiqo swa timali, rihanyo leri tsaneke, swiphiqo swa ndyangu, ni swihoxo leswi phikelelaka. Xana hi nga swi kombisa njhani leswaku hi tshemba Yehovha loko hi langutane ni swiyimo leswi?
9 Tindzalama Letintshwa Ta Moya: Hi tsakile swinene loko hi kuma buku leyintshwa leyi nge Gandzela Xikwembu Xi Ri Xin’we Xa Ntiyiso. Xana xitiviso xa xikongomelo xa buku leyi xi ku khumbe njhani? Ha yini yi ta va mpfuno eka ntirho wa hina wo endla vadyondzisiwa tanihi leswi yi nga ta va buku ya vumbirhi leyi dyondziwaka?
10 Endzhaku ka sweswo hi kume buku yo saseka leyi nge Tshinela Eka Yehovha. Hi tihi timhaka tin’wana to hlawuleka hi buku leyi? Hi swihi swifaniso swa yona leswi u swi tsakelaka ngopfu? Xana loko u yi hlaya u titwe u tshinela eka Yehovha hi ndlela yo karhi? I vamani van’wana lava yi nga va pfunaka?
11 Ntsombano wa Muganga wa “Vachumayeri Va Mfumo Lava Hisekaka” wu hi khutazile swinene emoyeni leswaku hi kota ku langutana ni minkarhi leyi yo nonon’hwa. Leswaku hi vuyeriwa hi xitalo eka lunghiselelo leri ro hlawuleka ra timhaka ta moya, onge hi nga tikarhata hi matimba hinkwawo leswaku hi tsundzuka leswi vuriweke, hi tlangela leswi hi swi kumeke ni ku tirhisa leswi hi swi dyondzeke. (2 Pet. 3:14) Loko hi endla sweswo hi ta tshama hi tshembekile naswona hi ta va vachumayeri va Mfumo lava hisekaka, lava tekelelaka Hosi ya hina Yesu Kreste, kutani hi yisa ku dzuneka hinkwako eka Yehovha.—Filp. 1:9-11.