Kombisa Nkhathalelo Wa Rirhandzu Eka “Vana Lava Nga Riki Na Tatana”
1 Yehovha i “Tata wa vana lava nga riki na tatana.” (Ps. 68:5) Ku khathala ka yena hi vuhlayiseki bya vona ku kombisiwa hi xileriso lexi landzelaka, lexi a xi nyikeke tiko ra khale ra Israyele: “Mi nga tshuki mi xanisa noni yihi ni yihi kumbe n’wana la nga riki na tatana. Loko mo tshuka mi n’wi xanisile, kutani a huwelela eka mina, hakunene ndzi ta twa xirilo xa yena.” (Eks. 22:22, 23) Nakambe Nawu wa Xikwembu a wu katsa ni malunghiselelo yo pfuna vanhu vo tano hi swilaveko swa vona swa nyama. (Det. 24:19-21) Ehansi ka lunghiselelo ra Vukreste, vagandzeri va ntiyiso va tsundzuxiwa “ku khathalela lava nga riki na vatswari ni tinoni enhlomulweni wa tona.” (Yak. 1:27) Xana hi nga wu tekelela njhani nkhathalelo wa Yehovha wa rirhandzu eka lava tshamaka emindyangwini ya mutswari un’we leyi nga riki eka vukhongeri byin’we?
2 Ndzetelo Wa Moya: Loko u ri mutswari la nga yexe kumbe u ri ni munghana wa vukati la nga riki mupfumeri, ku dyondza Bibele ni vana va wena swi nga va ntlhontlho. Kambe dyondzo ya Bibele ya nkarhi na nkarhi ni leyi nga ni xikongomelo i ya nkoka leswaku va kula va hanya vutomi lebyinene va tlhela va va lava vupfeke. (Swiv. 22:6) Ku burisana na vona siku na siku hi timhaka ta moya na swona i swa nkoka. (Det. 6:6-9) Minkarhi yin’wana u nga ha titwa u hela matimba, kambe u nga karhali. Kombela Yehovha leswaku a ku tiyisa ni ku ku kongomisa loko u ri karhi u ‘hambeta u kurisa vana va wena hi ku tshinya ni nkongomiso wa mianakanyo wa Yehovha.’—Efe. 6:4.
3 Loko u lava mpfuno eku khathaleleni ka vutihlamuleri bya wena bya Matsalwa, tivisa vakulu. Va nga ha ku pfuna hi swiringanyeto leswi tirhaka kumbe va ku pfuna ku kuma ndlela leyinene yo tamela timhaka ta moya endlwini ya wena.
4 Ndlela Leyi Van’wana Va Nga Pfunaka Ha Yona: Eka lembe-xidzana ro sungula, Timotiya u ve nandza wa Yehovha la hisekaka hambileswi a kuleleke endyangwini lowu avaneke hi tlhelo ra vukhongeri. Handle ko kanakana, matshalatshala ya mana wakwe ni kokwa wakwe yo n’wi dyondzisa matsalwa yo kwetsima evuntshweni bya yena ma n’wi pfunile swinene. (Mint. 16:1, 2; 2 Tim. 1:5; 3:15) Hambiswiritano, u tlhele a pfuniwa hi vanakulobye ni Vakreste van’wana, ku katsa na muapostola Pawulo, loyi a vulavuleke hi Timotiya tanihi ‘n’wana loyi a rhandzekaka ni loyi a tshembekaka eHosini.’—1 Kor. 4:17.
5 Hilaha ku fanaka ni namuntlha, i swinene ngopfu loko vamakwerhu lava vupfeke emoyeni va kombisa nkhathalelo wa rirhandzu eka vana lava nga riki na vatatana evandlheni! Xana wa ma tiva mavito ya vona? Xana wa vulavula na vona eminhlanganweni ya Vukreste ni kun’wana? Va rhambe loko u ya evutirhelini bya nsimu. Nkarhi wun’wana u nga va katsa swin’we ni vatswari va vona lava nga voxe kumbe lava vanghana va vona va vukati va nga riki vapfumeri, eka dyondzo ya n’wina ya ndyangu kumbe eka malunghiselelo ya vuhungasi lebyinene. Loko vantshwa lava va ku teka tanihi munghana wa vona, swi ta va olovela ku tekelela xikombiso xa wena ni ku amukela xikhutazo.—Filp. 2:4.
6 Yehovha wa khathala swinene hi vana lava nga riki na vatatana, naswona u katekisa matshalatshala ya hina yo va pfuna va endla ntiyiso wu va wa vona. Vo tala lava tshamaka emindyangwini ya mutswari un’we kumbe leyi avaneke va kume xikhutazo xo tano naswona sweswi va tirha hi ku tshembeka tanihi maphayona, malandza ya vutirheli, vakulu, valanguteri lava famba-fambaka, varhumiwa kumbe swirho swa ndyangu wa Bethele. Onge hinkwerhu ka hina hi nga lava tindlela to ‘ndlandlamuxa’ vuxaka bya hina ni vana lava nga riki na vatatana, hi tekelela Tata wa hina wa le tilweni.—2 Kor. 6:11-13.