Tshinela Eka Xikwembu
Tata Wa Vana Lava Nga Riki Na Tatana
“TATA wa [vana] lava pfumalaka vatswari . . . i Xikwembu lexi tshamaka exivandleni lexo hlawuleka.” (Pisalema 68:5, Bibele—Mahungu Lamanene) Marito wolawo lama huhuteriweke ma hi dyondzisa leswaku Yehovha Xikwembu wa khathala hi swilaveko swa swisiwana. Nawu lowu a wu nyikeke Vaisrayele wu swi veka erivaleni leswaku wa khathala hi vana lava feriweke hi mutswari. A hi kambisiseni buku ya Eksoda 22:22-24 laha xiga lexi nge “vana lava nga riki na tatana” xi humelelaka kona ro sungula eBibeleni.
Xikwembu xi lemukise Vaisrayele xi ku: “Mi nga tshuki mi xanisa . . . n’wana la nga riki na tatana.” (Ndzimana 22) Lexi a ku nga ri xikombelo eka vanhu leswaku va pfuna vana lava a va xaniseka hikwalaho ka leswi va feriweke hi mutswari; a ku ri xileriso xa Xikwembu. N’wana loyi a feriweke hi tatana a a ri hava munhu loyi a a ta n’wi sirhelela ni ku n’wi wundla, xisweswo a a ri ekhombyeni ro khomiwa hi ndlela yo biha hi vanhu van’wana. N’wana wo tano a a nga fanelanga a ‘xanisiwa’ nikatsongo. Eka Tibibele tin’wana, rito leri nge “xanisa” ri hundzuluxeriwe ri va “ku khomiwa hi ndlela yo biha.” Ku dyohela n’wana loyi a nga riki na tatana a ku ri xidyoho lexikulu eka Xikwembu. Hi ndlela yihi?
Nawu wu ya emahlweni wu ku: “Loko [wo] tshuka [u] n’wi xanisile, kutani a huwelela eka mina, hakunene ndzi ta twa xirilo xa yena.” (Ndzimana 23) Eka ndzimana 22 ku tirhisiwe rito “mi” leri kombetelaka eka vunyingi kasi eka ndzimana 23 ku tirhisiwe rito “u” leri kombetelaka eka vun’we. Munhu un’wana ni un’wana swin’we ni tiko hinkwaro a va ri ni vutihlamuleri lebyi fanaka byo yingisa nawu lowu wa Xikwembu. Yehovha a a langutile; a a voyamisele ndleve yakwe eka vana lava nga riki na tatana, a lunghekele ku teka goza loko va rilela mpfuno.—Pisalema 10:14; Swivuriso 23:10, 11.
Kutani a ku ta endleka yini loko munhu wo karhi a xanisa n’wana loyi a nga riki na tatana, kutani a rilela Xikwembu leswaku xi n’wi pfuna? Yehovha u ri: “Kunene ku hlundzuka ka mina ku ta va kukulu, kunene ndzi ta mi dlaya hi banga.” (Ndzimana 24) Buku yin’wana leyi hlamuselaka Bibele yi vula leswaku ndzimana leyi “hi ku kongoma yi vula leswaku ‘ndzi ta bava ndzi khalakhasa,’ leswi vulaka ku hlundzuka lokukulu.” Xiya leswaku Yehovha a nga swi tshikelanga vaavanyisi va le Israyele leswaku ku va vona lava xupulaka vanhu lava nga wu yingisiki nawu lowu. Xikwembu hi xoxe a xi ta avanyisa munhu un’wana ni un’wana loyi a xanisaka n’wana loyi a nga kotiki ku tisirhelela.—Deteronoma 10:17, 18.
Yehovha a nga hundzukanga. (Malakiya 3:6) U va twela vusiwana vana lava nga riki na mutswari kumbe vatswari. (Yakobo 1:27) Yehovha loyi a nga Tatana wa vana lava nga riki na tatana swa n’wi hlundzukisa ku vona vana vo tano va khomiwa hi ndlela yo biha. Vanhu lava xanisaka n’wana loyi a nga kotiki ku tisirhelela a va nge ku balekeli “ku hlundzuka ka Yehovha.” (Sofaniya 2:2) Vanhu vo tano vo homboloka va ta dyondza leswaku “i nchumu lowu chavisaka ku wela emavokweni ya Xikwembu lexi hanyaka.”—Vaheveru 10:31.