Dyondzisa Van’wana Ririmi Leri Tengeke
1 Hambileswi Timbhoni ta Yehovha ti humaka eka ‘matiko, tinyimba, vanhu ni tindzimi’ to tala, i vanhu lava twananaka, lava nga ni vun’we bya ntiyiso ematikweni hinkwawo. (Nhlav. 7:9) Emisaveni ya namuntlha leyi avaneke, sweswo swa pfumaleka. Xana hi swi kotisa ku yini? Hi swi endla hileswi hi ‘hundzukeleke eka ririmi leri tengeke.’—Sof. 3:9.
2 Vuyelo Lebyi Hlamarisaka: Xana ririmi leri tengeke i yini? I ku twisisa loku faneleke ka ntiyiso lowu kumekaka eRitweni ra Xikwembu malunghana na Yehovha ni swikongomelo swa yena, ngopfu-ngopfu ntiyiso malunghana ni Mfumo wa Xikwembu. Hilaha Yesu a profeteke hakona, ntiyiso lowu wu hangalasiwa hi ku tirhisa “hlonga ro tshembeka ni ro tlhariha” ra laha misaveni, hikwalaho, vanhu lava “humaka eka tindzimi hinkwato ta matiko” va amukela vugandzeri bya ntiyiso.—Mat. 24:45; Zak. 8:23.
3 Loko vanhu va ri karhi va dyondza ririmi leri tengeke, va susumeteleka ku cinca mahanyelo ya vona va ma twananisa ni milawu ya Yehovha. Va dyondza ku “hlangana hilaha ku faneleke emianakanyweni yin’we ni le ndleleni yin’we ya ku ehleketa.” (1 Kor. 1:10) Dyondzo ya Xikwembu yi endla leswaku va va ni mahanyelo lamanene, va vulavula ntiyiso, ngopfu-ngopfu hi ku byela van’wana mahungu lamanene. (Tito 2:7, 8; Hev. 13:15) Ku cinca loku, loku hlamarisaka ku endla leswaku Yehovha a dzunisiwa.
4 Hi xikombiso, wanuna un’wana loyi a tweke mahungu lamanene, u ve ni swivutiso swo tala, naswona hinkwaswo ka swona swi hlamuriwe hi ku tirhisa Bibele. Hi ku susumetiwa hi leswi a swi tweke, u sungule ku dyondza kambirhi hi vhiki ni ku ya eminhlanganweni. U hlamarile ku vona ndlela ya rirhandzu leyi a amukeriweke ha yona eHolweni ya Mfumo, tanihi leswi vo tala lava a va ri kona a va ri va rixaka rin’wana. Hi ku hatlisa yena ni nsati va cince mahanyelo ya vona kutani va khuvuriwa. Ku sukela kwalaho u pfune vanhu van’wana va kwalomu ka 40 leswaku va tirhela Yehovha, ku katsa ni swirho swo hlayanyana swa ndyangu. Hambileswi a lamaleke, sweswinyana wa ha ku nghenela ntirho wa vuphayona.
5 Ku Dyondzisa Van’wana: Swiendlakalo swa misava swi endla leswaku vanhu vo tala va timbilu letinene va kambisisa miehleketo ni vutomi bya vona. Ku fana na Yesu, hi fanele hi navela ku va pfuna. Maendzo yo vuyela ni tidyondzo ta Bibele leti humelelaka hi swona swi nga xilotlelo xo pfuna vanhu va timbilu letinene leswaku va dyondza ririmi leri tengeke.
6 Xingheniso lexi pfunaka loko hi kuma vanhu va khomekile i ku sungula dyondzo ya Bibele ta ha suka. (km-TS 5/02 tl. 1) Xana u swi ringetile leswi? Loko u lunghiselela ku ya endla riendzo ro vuyela, hlawula xingheniso lexi fanelaka n’wini wa muti eka leswi nga eka xiengetelo xa Vutirheli Bya Hina Bya Mfumo bya January 2002. Swo tala swa swingheniso leswi kumekaka eka xiengetelo lexi swi hleleriwe ku sungula bulo hi ku tirhisa broxara leyi nge Leswi Xi Swi Languteleke kumbe buku leyi nge Vutivi. Titolovete xingheniso leswaku u kota ku sungula bulo ra wena kahle hi ku tirhisa yin’wana ya tindzimana. Hlawula tsalwa rin’we kumbe mambirhi endzimaneni leswaku u ma hlaya ni ku ma hlamusela, kutani u hlela xivutiso lexi u nga ta gimeta ha xona. Sweswo swi ta ku pfuna ku kota ku ya eka ndzimana leyi u kunguhateke leswaku mi vulavula hi yona eka riendzo leri landzelaka.
7 Vanhu va Yehovha va kuma mikateko yo tala hikwalaho ko dyondza ririmi leri tengeke. Onge hi nga hisekela ku pfuna van’wana leswaku va hlanganyela na hina eku ‘vitaneni ka vito ra Yehovha,’ ni ku “n’wi tirhela hi mbilu yin’we.”—Sof. 3:9.