Leswi Hi Nga Swi Vulaka Hi Timagazini

Xalamuka! Jan. 8

“Eka nkandziyiso lowu wa Xalamuka! ku vutisiwa xivutiso xa nkoka lexi nge: ‘Xana Vakreste Va Fanele Va Va Swisiwana?’ Wena u swi vonisa ku yini? [Yimela nhlamulo.] Namuntlha vanhu vo tala va hanya hi rikoko ra xilondza. Kambe, xana Xikwembu xi swi languta njhani swisiwana kun’we ni swifumi? [Hlaya 1 Timotiya 2:4.] Hinkwavo va nga swi kota ku amukeriwa hi Xikwembu ni ku kuma vutomi lebyi nga heriki, ntsendze loko va kuma vutivi lebyi kongomeke bya ntiyiso ivi va byi tirhisa evuton’wini bya vona. Ndza tshemba leswaku u ta swi tsakela ku hlaya mhaka leyi eka magazini lowu.”

Xihondzo xo Rindza Jan. 15

“Hikwalaho ka ku halatiwa ka ngati loku veke kona, xana u anakanya leswaku vubihi byi hlule vunene? [Yimela nhlamulo.] Xiya leswi Bibele yi swi vulaka malunghana ni Xikwembu. [Hlaya Pisalema 83:18b.] Tanihi leswi Xikwembu xi nga eHenhla-henhla emisaveni, xana vubihi byi nga hlula hakunene? [Yimela nhlamulo.] Nkandziyiso lowu wa Xihondzo xo Rindza wu nyikela nhlamulo leyi enerisaka eka xivutiso xexo.”

Xihondzo xo Rindza Feb. 1

“Vanhu vo tala namuntlha va karhateka hikwalaho ko pfumaleka ka mintirho, naswona van’wana va tshikileriwe hi swiyimo swo tika emintirhweni. Xana u anakanya leswaku swa koteka ku titwa u tsakile naswona u hlayisekile entirhweni? [Yimela nhlamulo. Kutani hlaya Esaya 65:21-23.] Nkandziyiso lowu wa Xihondzo xo Rindza wu hlamusela nkarhi lowu ha wona vanhu hinkwavo va nga ta tirha ntirho lowu vuyerisaka.”

Xalamuka! Feb. 8

“Nkandziyiso lowu wa Xalamuka! wu hlamusela swiendlakalo swo vava swa nkarhi wa hina—ku sindzisa vana leswaku va xavisa miri. Bibele yi tshembisa leswaku xiendlo lexi xa manyala xa ku xanisa vana xi ta hela ku nga ri khale. [Hlaya Swivuriso 2:21, 22.] Magazini lowu wu hlamusela xivangelo xa xiendlo xo tano xa ku xanisa vana ku katsa ni ndlela leyi xi nga ta herisiwa ha yona.”