Hlutekani eMianakanyweni Tanihi Leswi Makumu Ma Tshinelaka

¹ Rito ra Xikwembu hi ku phindha-phindha ri hlamusela siku ra Yehovha ri ri leri taka “kukotisa khamba”—leswi vulaka leswaku ri ta ta hi xitshuketa, ri nga rindzeriwanga. (1 Tes. 5:2; Mat. 24:43; 2 Pet. 3:10; Nhlav. 3:3; 16:15) “Hikwalaho,” Yesu u te, “tshamani mi lunghekile, hikuva N’wana wa munhu u ta ta hi nkarhi lowu mi nga wu ehleketiki.” (Mat. 24:44) Xana hi nga swi kotisa ku yini ku tshama hi xalamukile hi tlhelo ra moya tanihi leswi makumu ma tshinelaka? Xilotlelo xi kumeka eka ndzayo leyi huhuteriweke, leyi nge: “Hlutekani emianakanyweni.”—1 Pet. 4:7.

² Ku hluteka emianakanyweni swi katsa ku languta swilo hi ndlela leyi Yehovha a swi langutaka ha yona. (Efe. 5:17) Swi hi pfuna leswaku hi tivona hi ri “valuveri ni vatshami va nkarhinyana” emafambiselweni lawa ya swilo. (1 Pet. 2:11) Swi endla leswaku hi kota ku vona swilo leswi swi nga swa nkoka hakunene, hi rhangisa swilo leswi faneleke ni ku endla swiboho leswinene.—Filp. 1:10.

³ Tivekele Tipakani Ta Moya: Ku veka tipakani ta moya ni ku ti fikelela swi endla leswaku hi hluteka emianakanyweni. Xana u na tona tipakani ta moya leti sweswi u ringetaka ku ti fikelela? Xana u lwela ku hlaya Bibele siku ni siku, ku va kona eminhlanganweni hinkwayo ya Vukreste, ku hlaya nkandziyiso wun’wana ni wun’wana wa Xihondzo xo Rindza ni Xalamuka! kumbe ku heta nkarhi lowu engetelekeke evutirhelini bya nsimu? Loko u tivekela tipakani leti faneleke wena, u hambeta u ringeta ku ti fikelela naswona u kombela Yehovha leswaku a katekisa matshalatshala ya wena, vuyelo bya kona byi nga ku hlamarisa.

⁴ Nkulu un’wana u vutise mpatswa lowa ha riki wuntshwa malunghana ni tipakani ta wona ta moya. Xivutiso lexi xi pfune vatekani lava ku lemuka leswaku loko vo hanya vutomi byo olova ni ku heta swikweleti leswi swi va tshikilelaka, va nga swi kota ku phayona. Hiloko va tivekela pakani yoleyo. Va lwe hi matimba leswaku va hakela xikweleti xa vona, va papalata swilo leswi nga riki swa nkoka leswi a swi dya nkarhi wa vona ni ku va karharisa. Endzhaku ka lembe rin’we ntsena, va fikelele pakani ya vona. Vuyelo byi ve byihi? Nuna wa kona u ri: “Loko a hi nga ti vekelanga tipakani, a hi ta va hi nga swi fikelelanga leswi. Hi tsakile. Vutomi bya hina byi rhurile naswona bya antswa. Byi ni xikongomelo hakunene.”

⁵ Tanihi leswi hi rindzeke siku ra Yehovha, onge hi nga tshama hi xalamukile hi tlhelo ra moya hi ku hanya hi ri ni mianakanyo leyi hlutekeke, hi hanyela ku endla ku rhandza ka Xikwembu.—Tito 2:11-13