Ntirho Lowu Phyuphyisaka
1 Rungula ra Bibele ri phyuphyisa vanhu hinkwavo lava va ri amukelaka va tlhela va ri tirhisa evuton’wini bya vona. (Ps. 19:7, 8) Ri va ntshunxa eka tidyondzo ta mavunwa ni le ka mikhuva yo biha kutani ri va nyika ntshembo wa xiviri wa vumundzuku bya vona. Hambiswiritano, a ku phyuphyi ntsena vanhu lava amukelaka mahungu lamanene. Ni lava byelaka van’wana ntiyiso wa Bibele lowu phyuphyisaka va phyuphya na vona.—Swiv. 11:25.
2 Ku Tiyisiwa Hi Vutirheli: Yesu u vule leswaku lava amukelaka joko ra ku va mudyondzisiwa wa Kreste, leri katsaka ntirho wa ku chumayela ni ku endla vanhu vadyondzisiwa, va ta “kumela mimoya-xiviri ya [vo]na ku phyuphya.” (Mat. 11:29) Yena hi byakwe u kume leswaku ku chumayela van’wana swa tiyisa. A ku fana ni swakudya eka yena. (Yoh. 4:34) Loko a rhuma vadyondzisiwa va 70 leswaku va ya chumayela, va tsakile loko va vona leswaku Yehovha wa ma seketela matshalatshala ya vona.—Luka 10:17.
3 Hilaha ku fanaka ni namuntlha, Vakreste vo tala va tiyisiwa hi ku hlanganyela entirhweni wo chumayela. Makwerhu un’wana wa xisati u te: “Vutirheli bya phyuphyisa hikuva byi endla leswaku vutomi bya mina byi va ni xikongomelo. Loko ndzi ri ensin’wini ndzi rivala swiphiqo swa mina ni mintshikilelo ya siku ni siku.” Makwerhu un’wana la hisekaka u te: “Siku ni siku vutirheli byi ndzi tsundzuxa leswaku Yehovha i wa xiviri naswona byi ndzi nyika ku rhula ni ku eneriseka loku a ndzi nga ta ku kuma hi ndlela yihi kumbe yihi yin’wana.” Hakunene i lunghelo eka hina ku va “vatirhi-kulobye ni Xikwembu”!—1 Kor. 3:9.
4 Joko Ra Kreste Ra Vevuka: Hambileswi Vakreste va khutaziwaka leswaku va ‘tirha hi matimba,’ Yesu u lava leswaku hi endla leswi nga ematimbeni ya hina. (Luka 13:24) Entiyisweni, u hi rhamba leswaku hi ‘rhwala joko na yena.’ (Mat. 11:29, nhlamuselo ya le hansi) Lava va langutaneke ni swiyimo swo tika a va tiyiseke leswaku ntirho wa vona wa mbilu hinkwayo, hambiloko wu ri wutsongo, wa amukeleka eka Xikwembu.—Mar. 14:6-8; Kol. 3:23.
5 Hakunene swa phyuphyisa ku tirhela Xikwembu lexi tlangelaka hinkwaswo leswi hi swi endlaka hikwalaho ka vito ra xona! (Hev. 6:10) Minkarhi hinkwayo a hi tikarhateleni ku xi endlela leswi nga ematimbeni ya hina.