Tekelela Vunene Bya Yehovha
1 Endzhaku ko hlalela ku saseka ka ku pela ka dyambu kumbe endzhaku ka swakudya leswi phomisaka marha, xana a hi susumeteleki ku nkhensa Yehovha, Xihlovo xa vunene? Vunene bya yena byi hi endla hi navela ku n’wi tekelela. (Ps. 119:66, 68; Efe. 5:1) Xana hi nga yi kombisa njhani mfanelo ya vunene?
2 Eka Lava Nga Riki Vapfumeri: Ndlela yin’wana yo tekelela vunene bya Yehovha i ku kombisa leswaku ha karhateka hi vanhu lava nga ni ripfumelo leri hambaneke ni ra hina. (Gal. 6:10) Ku pfuna vanhu swi nga endla leswaku va va ni langutelo lerinene hi Timbhoni ta Yehovha ni rungula leri hi ri khomeke.
3 Hi xikombiso, makwerhu wa xinuna la nga phayona, loko a ha rindzile etliliniki, a a tshame ekusuhi ni mukhegula un’wana loyi a a languteka a vabya swinene ku tlula hinkwavo lava nga kwalaho. Loko ku fika nkarhi wa leswaku a vonana na dokodela, makwerhu loyi u kombele mukhegula loyi leswaku a nghena ematshan’weni ya yena. Endzhaku ka sweswo u tlhele a hlangana ni mukhegula loyi emakete naswona mukhegula a a tsake ngopfu ku tlhela a n’wi vona. Hambileswi eku sunguleni a a nga ma tsakeli mahungu lamanene, u vule leswaku se wa swi tiva leswaku Timbhoni ta Yehovha ta va rhandza hakunene vaakelani va tona. Dyondzo ya Bibele ya nkarhi na nkarhi yi sunguriwile na yena.
4 Eka Vamakwerhu: Hi tlhela hi tekelela vunene bya Yehovha loko hi tikarhatela ku pfuna vapfumeri-kulobye. Loko ku ri ni timhangu, hi va vo sungula ku ya pfuna vamakwerhu. Moya lowu nakambe hi wu kombisa hi ku pfuna lava lavaka xo va fambisa eminhlanganweni, hi ku endzela lava vabyaka ni ku ringeta ku kurisa vuxaka eka lava hi nga va tolovelangiki swinene evandlheni.—2 Kor. 6:11-13; Hev. 13:16.
5 Ndlela yin’wana leyi Yehovha a kombisaka vunene ha yona i ku ‘lunghekela ku rivalela.’ (Ps. 86:5) Na hina hi nga n’wi tekelela, hi kombisa leswaku hi rhandza vunene, hi ku rivalela van’wana. (Efe. 4:32) Leswi swi ta endla leswaku vuxaka bya hina ni vapfumeri-kulobye byi va ‘byinene ni ku tsakisa.’—Ps. 133:1-3.
6 Onge vunene bya Yehovha byi nga endla leswaku hi n’wi dzunisa ni leswaku hi tshama hi tsakile. Naswona onge byi nga hi susumetela ku lwela ku tekelela vunene bya yena eka hinkwaswo leswi hi swi endlaka.—Ps. 145:7; Yer. 31:12.