Bokisi Ra Swivutiso

◼ Xana swa fanela ku vika dyondzo ya ndyangu ya Bibele?

Loko mutswari la nga Mukreste a fambisa dyondzo ya ndyangu ya Bibele leyi katsaka ni vana lava nga siki khuvuriwaka, mutswari a nga vika nkarhi lowu nga tluliki awara hi vhiki, riendzo ro vuyela rin’we hi vhiki ni dyondzo ya le kaya ya Bibele yin’we hi n’hweti. U ta vika awara hambiloko dyondzo leyi yi hete nkarhi wo tlula awara naswona yi fambisiwe ko tala evhikini ni loko n’wana un’wana ni un’wana a fambiseriwe dyondzo ya yena a ri yexe.—Vona buku leyi nge Vutirheli Bya Hina, tl.104.

Loko hinkwavo endyangwini va ri Timbhoni leti khuvuriweke, nkarhi ni dyondzo a swi nge vikiwi tanihi ntirho wa nsimu (handle ka loko n’wana a ha ri ku dyondzeni ka buku ya vumbirhi endzhaku ka nkhuvulo). Xivangelo hi leswaku xiviko xa vandlha xa ntirho wa nsimu i xa ntirho wo chumayela mahungu lamanene ni ku dyondzisa ntiyiso wa Bibele eka lava nga tinyiketelangiki ni ku khuvuriwa leswaku va va malandza ya Yehovha. (Mat. 24:14; 28:19, 20) Kambe leswi a swi vuli swona leswaku a hi swa nkoka ku fambisa dyondzo leyi minkarhi yo tala.

I vutihlamuleri bya vatswari lava nga Vakreste ku dyondza ni vana va vona. Lava va lavaka mpfuno wo sungula kumbe ku antswisa dyondzo ya vona ya ndyangu va nga vonana ni vakulu. Loko swiyimo swi koxa leswaku muhuweleri un’wana a fambisa dyondzo ya Bibele ni n’wana la nga siki khuvuriwaka loyi a humaka endyangwini wa Vakreste lava nga kona evandlheni, ku fanele ku vulavuriwa ni mulanguteri la ungamelaka kumbe mulanguteri wa ntirho. Loko dyondzo yo tano yi pfumeleriwile, loyi a yi fambisaka a nga yi vika ku fana ni tidyondzo tin’wana ta Bibele.

Ku letela vana etindleleni ta Yehovha swi lava matshalatshala lamakulu ni nkarhi wo tala ku tlula lowu wu humelelaka eka xiviko xa ntirho wa nsimu. (Det. 6:6-9; Swiv. 22:6) Vatswari lava nga Vakreste va fanele va bumabumeriwa hikwalaho ko byarha vutihlamuleri bya vona bya nkoka byo kurisa vana va vona “hi ku tshinya ni nkongomiso wa mianakanyo wa Yehovha.”—Efe. 6:4.