Bokisi Ra Swivutiso

◼ Xana vatswari va fanele va wu vika havambirhi nkarhi lowu va wu hetaka eka dyondzo ya ndyangu?

Hambileswi vatatana ku nga vona va nga ni vutihlamuleri bya ku dyondzisa vana leswaku va kula “hi ku tshinya ni nkongomiso wa mianakanyo wa Yehovha,” vatswari havambirhi va pfunana eku leteleni ka vana va vona. (Efe. 6:4) Bibele yi khutaza vana yi ku: “N’wananga, yingisa ndzayo ya tata wa wena, naswona u nga wu fularheli nawu wa mana wa wena.” (Swiv. 1:8) Ndlela yin’wana ya nkoka leyi vatswari va yi tirhisaka leswaku va letela vana va vona i ku va ni dyondzo ya ndyangu ya Bibele.

Enkarhini lowu hundzeke mutswari loyi a fambisaka dyondzo ya ndyangu ni vana lava nga khuvuriwangiki hi yena ntsena loyi a a ta vika nkarhi lowu va wu heteke eka dyondzo yoleyo ya ndyangu, hambiloko vatswari havambirhi va hoxe xandla. Kambe sweswo se swa cinciwa. Hi nkarhi wa dyondzo ya ndyangu, loko vatswari havambirhi va hoxa xandla eku dyondziseni vana va vona, havambirhi va nga vika awara yin’we vhiki na vhiki. Hi ntolovelo vatswari va heta nkarhi wo tlula awara vhiki ni vhiki va ri karhi va dyondzisa vana va vona. Ku dyondzisa vana swi lava leswaku vatswari havambirhi va endla matshalatshala nkarhi hinkwawo. (Det. 6:6-9) Kambe xiviko xa ntirho wa nsimu xa n’hweti ni n’hweti xi fanele xi kombisa ni leswi va swi endleke ensin’wini. Hikwalaho va fanele va vika awara yin’we ntsena vhiki ni vhiki hambiloko dyondzo ya ndyangu yi teke nkarhi wo tlula awara, niloko yi fambisiwe masiku yo hlayanyana evhikini kumbe loko va fambisela n’wana ha un’we dyondzo ya yena. Kambe mutswari un’we hi yena ntsena a nga ta vika riendzo rin’we ro vuyela ni dyondzo yin’we ya Bibele vhiki ni vhiki loko va dyondza ni vana va vona.