Ku Ya eMinhlanganweni Nkarhi Hinkwawo I Mhaka Ya Nkoka

¹ Eka mindyangu ya Vakreste, ku ya eminhlanganweni ya vandlha nkarhi hinkwawo i mhaka ya nkoka. Kambe namuntlha swilo leswi hi swi endlaka siku ni siku swi nga hi kavanyeta. Xana mintirho ya le kaya, ntirho wo tihanyisa, kumbe ntirho wa xikolo wu sungula ku dya nkarhi lowu vekeriweke vugandzeri bya Yehovha? Ku languta swilo hi ndlela leyi Yehovha a swi langutaka ha yona swi ta hi pfuna leswaku minkarhi hinkwayo hi rhangisa swilo swa moya.—1 Sam. 24:6; 26:11.

² Wanuna un’wana wa Muisrayele u tsandzeke ku languta swilo hi ndlela leyi Yehovha a swi langutaka ha yona, hi ku rhotela tihunyi hi Savata. Swi nga ha endleka a tibyele leswaku u pfuna ndyangu wakwe kumbe a tibyele leswaku i nchumu wutsongo. Hambiswiritano, ndlela leyi Yehovha a n’wi avanyiseke ha yona yi kombise leswaku i nandzu ku endla mintirho ya siku ni siku hi nkarhi lowu vekeriweke vugandzeri.—Tinhl. 15:32-36.

³ Lexi Hi Nga Xi Endlaka Leswaku Hi Nga Kavanyeteki: Eka vo tala swa tika ku endla leswaku ntirho wo tihanyisa wu nga kavanyeti nkarhi wa vona wo ya eminhlanganweni. Van’wana va tlhantlhe xiphiqo lexi hi ku vulavula ni vathori va vona, hi ku cincana minkarhi yo tirha ni vatirhi-kulobye, hi ku lava ntirho wun’wana kumbe va olovisa ndlela leyi va hanyaka ha yona. Entiyisweni, Xikwembu xi tsaka ngopfu loko munhu a titsona swo karhi hikwalaho ka vugandzeri bya ntiyiso.—Hev. 13:16.

⁴ Ntirho wa xikolo na wona wu nga hi kavanyeta. Muntshwa un’wana u ri: “Ntirho wun’wana wa xikolo ndzi wu endla ndzi nga si ya eminhlanganweni ivi ndzi wu hetisa loko ndzi vuya.” Loko ntirho wa xikolo wa siku rero swi nga ta koteka ku wu heta eka madyambu ya siku ra minhlangano, vatswari van’wana va hlamusele vadyondzisi leswaku ku ya eminhlanganweni ya Vukreste i mhaka ya nkoka endyangwini wa vona.

⁵ Ntirhisano ni ku hleleka i swa nkoka loko mi endla mintirho ya le kaya leswaku mi tilunghiselela ku ya fika eminhlanganweni hi nkarhi tanihi ndyangu. (Swiv. 20:18) Hambi ku ri swihlangi swi nga dyondzisiwa ku ambala ka ha ri ni nkarhi leswaku swi lunghekela ku ya eminhlanganweni hi nkarhi lowu vekiweke. Loko vatswari va ri xikombiso lexinene, swi ta dzika emianakanyweni ya vana va vona leswaku minhlangano i ya nkoka.—Swiv. 20:7.

⁶ Leswi mintshikilelo ya mafambiselo lawa ya swilo yi yaka yi engeteleka, i swa nkoka leswaku hi va kona eminhlanganweni ya vandlha nkarhi hinkwawo. Onge hi nga hambeta hi languta timhaka hi ndlela leyi Yehovha a ti langutaka ha yona naswona hi rhangisa ku va kona eminhlanganweni nkarhi hinkwawo.—Hev. 10:24, 25.