“Rhandzani Yehovha, N’wina Hinkwenu Lavo Tshembeka”
Rifu Ra Yesu Ri Ta Tsundzukiwa Hi April 4
1 Khale, loko Ukraine ra ha ri ehansi ka vulawuri bya Vukhomunisi, valawuri a va tshama va veke vamakwerhu tihlo hikuva xikongomelo xa vona a ku ri ku kuma ndhawu leyi va hlanganaka eka yona, ngopfu-ngopfu loko siku ra Xilalelo xa Hosi ri tshinela. Xiphiqo lexi a xi nyanyisiwa hi leswi valawuri a va swi tiva loko siku ra xitsundzuxo ri ri ekusuhi. Xana vamakwerhu a va ta endla yini? Ekaya ra makwerhu un’wana wa xisati a ku ri ni kamara ra le hansi leri a ri tele hi mati. Leswi valawuri a va nga ta ehleketa leswaku vanhu va nga hlangana endhawini yo fana ni leyi, vamakwerhu va ake platifomo ehenhla ka mati lawa a ma ente ku fika ematsolweni. Hambileswi a va khinsame hi matsolo ehenhla ka platifomo yoleyo, hikwalaho ka leswi loko vo yima a va ta khumba elwangwini, a va kavanyetiwanga hi munhu loko va ri karhi va tlangela Xitsundzuxo va tsakile tanihi vandlha.
2 Ku tiyimisela ka vamakwerhu va le Ukraine ku yingisa xileriso xo tsundzuka rifu ra Yesu ku kombise rirhandzu leri va nga na rona hi Xikwembu hi ndlela leyi hlamarisaka. (Luka 22:19; 1 Yoh. 5:3) Nkarhi wun’wana ni wun’wana loko ku tlhekeka swiyimo leswi hingakanyaka ndlela ya hina, onge hi nga khutaziwa hi swikombiso swo fana ni leswi naswona hi tiyimisela ku va kona eku tlangeleni ka Xilalelo xa Hosi hi April 4. Hi ku endla tano, hi ta va hi kombisa leswaku hi titwa hi ndlela leyi mupisalema a titweke ha yona loko a yimbelela a ku: “Rhandzani Yehovha, n’wina hinkwenu lavo tshembeka vakwe.”—Ps. 31:23.
3 Pfuna Van’wana Leswaku Va Hambeta Va Rhandza Xikwembu: Ku rhandza Xikwembu swi tlhela swi hi susumetela ku rhamba van’wana leswaku va va na hina exitsundzuxweni. Xiengetelo xa Vutirheli Bya Hina Bya Mfumo bya February xi khutaza un’wana ni un’wana wa hina leswaku a tsala mavito ya vanhu lava a kunguhataka ku va rhambela eXitsundzuxweni. Xana u swi lunghekerile ku rhamba munhu un’wana ni un’wana loyi u tsaleke vito rakwe? Tinyike nkarhi wo va hlamusela ndlela leyi xiendlakalo lexi xi nga xa nkoka ha yona. Va tsundzuxe siku ni nkarhi wa Xitsundzuxo, loko swi fanerile, ku va byela leswaku u nga va landza swi nga va khutaza leswaku va va kona.
4 Loko u ri exitsundzuxweni endla matshalatshala yo xeweta lava rhambiweke, u va endla va titwa va ri ekaya. Xana u nga va pfuna njhani leswaku va hambeta va rhandza Yehovha? Tinyike nkarhi wo hlamula swivutiso swa vona. Loko swi fanerile va byele leswaku u nga va fambisela dyondzo ya Bibele. Va rhambe leswaku va va kona eminhlanganweni ya hina ya vhiki ni vhiki. Vakulu ngopfu-ngopfu va fanele va tinyika nkarhi wo vulavula ni Vakreste lava holeke lava nga kona exitsundzuxweni. Va fanele va endla malunghiselelo yo endzela vanhu vo tano ni ku va khutaza leswaku va tlhela va tihlanganisa ni vandlha, kumbexana va va pfuna hi ku tirhisa tinhla leti boxiweke eXitsundzuxweni.—Rhom. 5:6-8.
5 Ku Endla Leswaku Rirhandzu Ra Hina Hi Yehovha Ri Ya Ri Kula: Ku anakanyisisa hi nyiko ya nkutsulo swi nga endla leswaku rirhandzu ra hina hi Yehovha ni N’wana wakwe ri ya ri kula. (2 Kor. 5:14, 15) Mbhoni yin’wana leyi se yi nga ni nkarhi wo leha yi ri karhi yi va kona eXitsundzuxweni yi vule leswi: “Hi xi langutele hi mahlo-ngati Xitsundzuxo. Lembe na lembe xi va nchumu wo hlawuleka swinene eka hina. Ndzi tsundzuka ndzi ri enkosini emalembeni ya 20 lama hundzeke, loko ndzi languta ntsumbu wa tatana, ndzi sungule ku vona ndlela leyi nkutsulo wu nga wa nkoka ha yona. Khale a ndzi nga yi tekeli enhlokweni dyondzo leyi. A ndzi ma tiva hinkwawo matsalwa lama vulavulaka hi nkutsulo hambi ku ri ku ma hlamusela! Endzhaku ka loko ndzi swi vone kahle leswaku rifu i yini, mbilu ya mina yi tele ntsako hikwalaho ko anakanya hi leswi gandzelo leri ra nkutsulo ri nga ta swi endla.”—Yoh. 5:28, 29.
6 Tanihi leswi siku ra Xitsundzuxo xa lembe leri ri tshinelaka, endla mbilu ya wena yi lunghekela xiendlakalo lexi. (2 Tikr. 19:3) Anakanyisisa hi nhlayo wo hlawuleka wa Bibele wa nkarhi wa Xitsundzuxo, lowu kombisiweke eka xibukwana lexi nge Ku Kambisisa Matsalwa Siku Ni Siku—2004 ni le ka 2004 Calendar. Van’wana va tsakela ku pfuxeta tindzima 112-16 eka buku leyi nge Nghwazi hi nkarhi wa dyondzo ya ndyangu. Van’wana va endla ndzavisiso hi ku tirhisa tibuku tin’wana leti humesiweke hi ntlawa wa hlonga ro tshembeka ni ro tlhariha. (Mat. 24:45-47) Hinkwerhu hi fanele hi boxa nyiko ya nkutsulo loko hi khongela. (Ps. 50:14, 23) Ina, hi nkarhi wa Xitsundzuxo, a hi hambeteni hi anakanyisisa hi rirhandzu leri Yehovha a hi kombiseke rona ni ku lava tindlela to kombisa leswaku ha n’wi rhandza.—Mar. 12:30; 1 Yoh. 4:10.