Tekelela Langutelo Ra Mianakanyo Ra Yesu
1. Hi rihi langutelo ra mianakanyo leri Yesu a ri kombiseke?
1 Hambileswi hi nga si tshamaka hi vona N’wana wa Xikwembu, kambe ku hlaya mhaka leyi tsariweke ya vutomi ni leswi Yesu a swi endleke swi endle leswaku hi n’wi rhandza swinene. (1 Pet. 1:8) Hikwalaho ka leswi a a xixima ku rhandza ka Tata wakwe, u siye xikhundlha xakwe lexi tlakukeke xa le tilweni kutani a ta emisaveni. Loko a ha ri munhu wa nyama, u tirhele vanhu hi ku tirhandzela a tlhela a va fela. (Mat. 20:28) Rito ra Xikwembu ra hi khutaza: “Hlayisani langutelo leri ra mianakanyo eka n’wina leri a ri ri kona ni le ka Kreste Yesu.” Xana hi nga wu tekelela njhani moya wo tinyiketela lowu a a ri na wona?—Filp. 2:5-8.
2. Hi xihi xiphiqo lexi Vakreste vo tala va langutanaka na xona, naswona i yini lexi nga va pfunaka leswaku va xi hlula?
2 Loko A Karhele: Hambileswi Yesu a a hetisekile, a a karhala. Siku rin’wana, u chumayele wansati wa Musamariya kukondza a fikelela mbilu ya yena, hambileswi a a “karharisiwe hi riendzo.” (Yoh. 4:6) Ninamuntlha Vakreste vo tala va langutana ni xiphiqo lexi fanaka. Endzhaku ko tirha vhiki hinkwaro, swi nga ha tika ku va ni matimba yo ya entirhweni wo chumayela. Kambe loko hi titoloveta ku nga xwi ensin’wini, swi ta hi phyuphyisa emoyeni.—Yoh. 4:32-34.
3. Xana hi nga wu tekelela njhani moya wa Yesu wo tsakela ku dyondzisa?
3 Nakambe siku rin’wana, Yesu ni vadyondzisiwa vakwe va ye enhoveni leswaku va ta wisanyana. Hambiswiritano, ntshungu lowukulu wu swi tshuburile leswaku va le kwihi, hiloko wu tsutsumela kwale va nga kona. Ematshan’weni yo karhateka, Yesu u ‘wu twele vusiwana’ kutani a wu “dyondzisa swilo swo tala.” (Mar. 6:30-34) Swi lava leswaku munhu a va ni langutelo leri fanaka ni rero leswaku a kota ku sungula tidyondzo ta Bibele a tlhela a ti fambisa. Sweswo swi lava leswaku u phikelela naswona u rhandza vanhu hi mbilu hinkwayo. Loko u nga ri na dyondzo ya Bibele leyi u yi fambisaka sweswi, u nga heli matimba, ringeta ku yi kuma.
4. Xana vuphayona bya nkarhinyana byi nga hi pfuna njhani leswaku hi tekelela langutelo ra mianakanyo ra Kreste?
4 Rhangisa Timhaka Ta Moya: Vuphayona bya nkarhinyana byi nga hi pfuna ku rhangisa mintirho ya swa moya. Makwerhu un’wana wa xisati lontsongo u tsarile: “Mana wa un’wana wa vanghana vanga u hi khutaze havambirhi leswaku hi phayona na yena n’hweti yin’we. Ndza tsaka leswi hi phayoneke swin’we na yena. Ndzi tsakele ku tolovelana ni vamakwerhu, naswona a swi hlwelanga leswaku ndzi va teka onge i vandyangu wa ka hina. Nakambe ndzi tiphine hi ku va ni nkarhi wo tala wo vulavula ni van’wana hi Yehovha ni ku va dyondzisa ntiyiso lowu tsakisaka wa Mfumo. Hinkwaswo leswi swi ndzi endle ndzi titwa ndzi ri ekusuhi na Yehovha ni nhlengeletano yakwe.”—Ps. 34:8.
5. Ha yini hi fanele hi hambeta hi endla matshalatshala yo tekelela langutelo ra mianakanyo ra Yesu?
5 Hinkwerhu hi lwa ni nyama ya hina leyi nga hetisekangiki kasi hala tlhelo hi navela ku tsakisa Yehovha. (Rhom. 7:21-23) Hi fanele hi papalata moya wa misava wa ku nga lavi ku tirha hi matimba. (Mat. 16:22, 23) Yehovha u ta hi pfuna hi moya wakwe lowo kwetsima leswaku hi humelela enyimpini leyi. (Gal. 5:16, 17) Loko ha ha yimele ku kutsuriwa hi nghena emisaveni leyintshwa ya Xikwembu ya ku lulama, onge hi nga tekelela langutelo ra mianakanyo ra Yesu hi ku rhangisa timhaka ta Mfumo hi tlhela hi rhangisa swilo leswi tsakisaka van’wana.—Mat. 6:33; Rhom. 15:1-3.