Tshamani Mi Ri Karhi Mi Hiteka!
1 Yesu a a swi tiva leswaku laha misaveni a a ri na nkarhi wutsongo wo endla ntirho wa Tata wakwe. (Yoh. 9:4) Hikwalaho, u hambete a chumayela hi ku hiteka, naswona u letele vadyondzisiwa va yena leswaku na vona va hiteka. (Luka 4:42-44; 8:1; 10:2-4) Rifuwo a ri nga ri ra nkoka eka yena. (Mat. 8:20) Xisweswo, u swi kotile ku heta ntirho lowu Yehovha a a n’wi rhume wona.—Yoh. 17:4.
2 Nkarhi I Wutsongo: Nkarhi wo chumayela mahungu lamanene “emisaveni hinkwayo leyi akiweke” i wutsongo. (Mat. 24:14) Vuprofeta bya Bibele byi paluxa leswaku hi le kusuhi swinene ni ku hela ka minkarhi ya makumu leyi hi hanyaka eka yona. Ku nga ri khale “lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu . . . va ta kuma nxupulo wa vuavanyisi bya ku loviseriwa makumu.” (2 Tes 1:6-9) Vuavanyisi byebyo byi ta fika hi xitshuketa. (Luka 21:34, 35; 1 Tes. 5:2, 3) Vanhu va fanele va xalamukela khombo leri va langutaneke na rona. Hi ni vutihlamuleri byo va pfuna leswaku va navela ku amukeriwa hi Yehovha loko nkarhi wa ha ri kona.—Sof. 2:2, 3.
3 Ku Endla Hinkwaswo Leswi Hi Nga Swi Kotaka: Malandza ya Xikwembu ma rhangisa ntirho wo chumayela evuton’wini bya wona hikuva ma swi xiya leswaku “nkarhi lowu seleke wu komile.” (1 Kor. 7:29-31; Mat. 6:33) Van’wana va tshike mintirho leyi va holelaka swinene kumbe swilo swin’wana swa ku tihanyisa leswaku va ta kota ku hlanganyela hi xitalo ensin’wini. (Mar. 10:29, 30) Van’wana va hambeta va va ni “swo tala swo swi endla entirhweni wa Hosi” hambiloko va langutana ni miringo. (1 Kor. 15:58) Kasi van’wana va hambete va chumayela mahungu lamanene hi makume ya malembe handle ko tsekatseka. (Hev. 10:23) Yehovha u ma tlangela swinene matshalatshala hinkwawo lawa va ma endlaka leswaku va seketela timhaka ta Mfumo.—Hev. 6:10.
4 Loko hi hanya hi ku gandzela Yehovha ni ku chumayela, sweswo swi hi pfuna leswaku hi tshama hi ri karhi hi anakanya hi siku ra Yehovha. Swi hi pfuna leswaku misava ya Sathana yi nga hi kavanyeti, naswona swa hi tiyisa leswaku hi tiyimisela ku tshama hi ri ni mahanyelo lama kwetsimaka. (2 Pet. 3:11-14) Kunene, loko hi hambeta hi chumayela hi ku hiteka, hi ta ponisa vutomi bya hina ni bya lava hi yingisaka.—1 Tim. 4:16.