Xana U Nga Pfuna Van’wana?
1 Minkarhini hinkwayo Yehovha u tshama a lunghekele ku pfuna malandza ya yena lama tshembekaka. (2 Tikr. 16:9; Esa. 41:10, 13) Esaya u n’wi fanise ni murisi, a ku: “Hi voko ra yena u ta hlengeleta swinyimpfana; u ta swi rhwala exifuveni xa yena. Leswi an’wisaka u ta swi byisa hi nkhathalelo.” (Esa. 40:11) Xiya tindlela tin’wana leti hi nga tekelelaka nkhathalelo wa Yehovha wa rirhandzu ha tona.
2 Pfuna Vanhu Lava Ha Ku Sungulaka Ku Hlanganyela: Hi nga pfuna vanhu lava ha ku sungulaka ku hlanganyela hi ku va rhamba leswaku hi ta tiphina na vona hi vunakulobye lebyi akaka. (Swiv. 13:20) Loko makwerhu un’wana wa xinuna a tsundzuka ndlela leyi van’wana va n’wi pfuneke ha yona loko a ha ku sungula ku hlanganyela ni vandlha, u te: “Ndyangu wun’wana wu ndzi rhambe ko hlayanyana leswaku ndzi hlanganyela na wona eka dyondzo ya wona ya ndyangu. Loko ndzi ri karhi ndzi endla nhluvuko, mpatswa wun’wana lowu phayonaka, na wona wu ndzi rhambe ko tala leswaku ndzi ya tirha na wona nsimu, a hi tirha siku hinkwaro. Minkarhi hinkwayo a hi bula hi timhaka ta swa moya.” U tlhele a ku: “Loko ndzi nga si va Mukreste a ndzi hamba ndzi ya eku titsakiseni hi vusiku bya Ravuntlhanu ni bya Mugqivela. Kambe sweswi nkarhi lowu ndzi wu hetaka ndzi ri ni vamakwerhu wu ndzi endla ndzi enerisa torha ra mina ra ku lava ku va ni vanghana.” Ndlela leyi vandlha ri n’wi rhandzisaka xiswona yi endle leswaku a tiya swinene eripfumelweni, sweswi hi vulavulaka, u le Bethele.—Kol. 2:6, 7.
3 Akanani: Hi nga ha vona xilaveko xo pfuna vamakwerhu loko va langutane ni swiyimo swo tika. Xana u nga hlela ku chumayela hi riqingho swin’we ni muhuweleri la lamaleke kumbe u kombela ku famba na yena eka dyondzo ya wena ya Bibele, kumbexana u ta ni xichudeni xa wena mi ta dyondzela laha a tshamaka kona? Xana mutswari la nga ni swihlangi a nga ha tsakela ku pfuniwa loko a ri ensin’wini? Xana va kona lava chavaka ku vulavula, lava nga tsakelaka leswaku u va pfuna ku endla maendzo yo vuyela kumbe ku chumayela hi ndlela yo karhi? Loko hi rhandza vamakwerhu hi ta susumeteleka ku lava tindlela leti hi nga va pfunaka ha tona.—Rhom. 14:19.
4 Loko hi tekelela ndlela ya rirhandzu leyi Yehovha a ma khathalelaka ha yona malandza yakwe, ha tiyisana, naswona hi hoxa xandla leswaku vandlha ri va ni vun’we, ni rirhandzu naswona ri vangamisa Tata wa hina wa le tilweni.—Efe. 4:16.