Xiyenge 5: Pima Leswaku U Ta Hlanganisa Rungula Ro Tanihi Kwihi
Ku Fambisa Tidyondzo Ta Bibele Leti Endlaka Nhluvuko
1 Loko Yesu a dyondzisa a a anakanyela vuswikoti bya vadyondzisiwa vakwe, kutani a a vulavula na vona “ntsena loko va ha kota ku yingisa.” (Mar. 4:33; Yoh. 16:12) Hilaha ku fanaka ninamuntlha, vadyondzisi va Rito ra Xikwembu va fanele va pima leswaku va ta hlanganisa rungula ro tanihi kwihi loko va dyondzisa xichudeni xa Bibele. Rungula leri mudyondzisi a nga ta ri dyondzisa ri ta ya hi vuswikoti ni swiyimo swa xichudeni xakwe.
2 Aka Ripfumelo Leri Tiyeke: Rungula leri swichudeni swin’wana swi nga ri twisisaka kahle loko swi ri dyondza hi nkarhi wun’we, ri nga ha lava leswaku eka swichudeni swin’wana ri avanyisiwa hi swiyenge swimbirhi kumbe swinharhu leswaku swi kota ku ri twisisa kahle. A hi lavi ku tsutsumisa nkarhi lerova xichudeni xi nga yi twisisi kahle dyondzo ya kona. Xichudeni ha xin’we xi fanele xi va ni masungulo yo tiya ya dyondzo ya xona leyintshwa ya Rito ra Xikwembu.—Swiv. 4:7; Rhom. 12:2.
3 Loko u ri karhi u fambisa dyondzo vhiki ni vhiki, heta nkarhi lowu ringaneke leswaku u pfuna xichudeni xi twisisa ni ku amukela leswi xi swi dyondzaka eRitweni ra Xikwembu. Papalata ku hatla u heta dyondzo lerova xi nga ha vuyeriwi hi dyondzo leyi fuweke leyi u xi dyondzisaka yona. Heta nkarhi u ri karhi u xi hlamusela tinhla-nkulu ni ku hlaya matsalwa-nkulu lama hlamuselaka xisekelo xa leswi u xi dyondzisaka swona.—2 Tim. 3:16, 17.
4 Tshama Eka Nhloko-mhaka Leyi Dyondziwaka: Hambileswi hi nga laviki ku hatlisisa dyondzo, hi fanele hi papalata ku hoxa timhaka leti nga fambisaniki na dyondzo yoleyo. Loko xichudeni xi rhandza ku nghenisa ngopfu timhaka ta xona n’wini, hi nga ha xi byela leswaku hi ta bula ha tona loko hi heta ku dyondza.—Ekl. 3:1.
5 Hi hala tlhelo, ku hisekela ka hina ntiyiso swi nga endla leswaku hi hlamusela swo tala ku tlula mpimo. (Ps. 145:6, 7) Nkarhi wun’wana yinhla kumbe ntokoto wo karhi swi nga pfuna leswaku dyondzo yoleyo yi twisiseka, kambe a hi fanelanga hi hoxa tinhla to tala kumbe hi rungula mintokoto yo leha lerova xichudeni xi nga ha koti ku kuma vutivi lebyi kongomeke bya tidyondzo ta Bibele.
6 Loko hi hlanganisa rungula leri ringaneke eka dyondzo ha yin’we, hi pfuna swichudeni swa Bibele leswaku swi kota ku “famba eku vonakaleni ka Yehovha.”—Esa. 2:5.