Nkhensa Musa Wa Yehovha Wa Rirhandzu
Xitsundzuxo Xa Rifu Ra Kreste Xi Ta Tlangeriwa Hi March 24
1. Xana Yehovha u hi kombise njhani musa wakwe wa rirhandzu?
1 Mupisalema u te: “Vanhu a va nkhense Yehovha hikwalaho ka musa wakwe wa rirhandzu ni mintirho yakwe yo hlamarisa eka vana va vanhu.” (Ps. 107:8) Xikwembu a xi kombisi vanhu musa wa rirhandzu hi ku va twela vusiwana ntsena. Sweswo swi kombisiwe kahle hi marito yo dzunisa lama huhuteriweke, lama nge: “Oho Yehovha, musa wa wena wa rirhandzu wu hambete wu ndzi seketela.” (Ps. 94:18) Mawaku musa wa rirhandzu wonghasi lowu Yehovha a hi kombiseke wona hi ku nyikela hi N’wana wakwe la tswariweke a ri swakwe!—1 Yoh. 4:9, 10.
2. Hi nga swi kombisa njhani leswaku ha n’wi nkhensa Yehovha?
2 Leswi siku ra Xitsundzuxo xa rifu ra Kreste ri tshinelaka, xana hi nga wu nkhensa njhani ‘musa wa Xikwembu wa rirhandzu’? (Ps. 59:17) Un’wana ni un’wana wa hina u fanele a tinyika nkarhi wo anakanyisisa hi masiku yo hetelela ya Yesu emisaveni. (Ps. 143:5) Nakambe swi ta ku pfuna ku landzela xiyimiso xo hlawuleka xa ku hlaya ka Bibele ka vhiki ra Xitsundzuxo hilaha xi andlariweke hakona exibukwanini lexi nge Ku Kambisisa Matsalwa Siku Ni Siku—2005, naswona loko swi koteka u nga endla ndzavisiso eka tindzimana 112-16 ta buku leyi nge Nghwazi ni le tibukwini tin’wana leti sekeriweke eBibeleni. Anakanyisisa hi leswi u swi hlayeke, u dzika eka swona. (1 Tim. 4:15) Xikhongelo swin’we ni ku dyondza Rito ra Xikwembu swi ta tiyisa mbilu ya hina swi tlhela swi kombisa ndlela leyi hi n’wi rhandzaka ha yona Yehovha.—Mat. 22:37.
3, 4. (a) Xana hi nga wu tekelela njhani moya wa vamakwerhu va le Liberia? (b) I vamani lava u nga hlela ku va rhamba eXitsundzuxweni?
3 Khutaza Ni Van’wana Leswaku Va Nkhensa Xikwembu: N’wexemu, eXitsundzuxweni a ku ri ni vanhu va 16 760 607 emisaveni hinkwayo. Eximutanini xin’wana xa le Liberia, vamakwerhu va tsalele hosi papila, va yi tivisa leswaku va lava ku tlangela Xilalelo xa Hosi eximutanini xexo. Hosi yi va nyike mpfumelelo wo tirhisa rivala ra mintlangu yi tlhela yi endla xitiviso xo rhamba vanhu eximutanini hinkwaxo leswaku va va kona eXitsundzuxweni. Hambileswi a ku ri ni vahuweleri va ntlhanu ntsena eximutanini xexo, kambe lava veke kona eXitsundzuxweni a va ri 636!
4 Na hina hi lava ku pfuna vanhu vo tala hilaha hi nga kotaka hakona leswaku va ta tlangela Xitsundzuxo swin’we na hina. Ha yini u nga tsali nxaxamelo wa lava u nga ta va rhamba? Eka tluka ro hetelela ra Xalamuka! ya March 8, ni ra Xihondzo xo Rindza xa March 15, ku ni swirhambo. U nga ha tirhisa ni swiphephana swa swirhambo swa Xitsundzuxo. Tsala nkarhi ni ndhawu leyi xi nga ta tlangeriwa eka yona exiphephanini xa xirhambo kutani u nyika un’wana ni un’wana loyi u n’wi rhambaka. Loko siku ra March 24 ri ri kusuhi, tlhela u tsundzuxa un’wana ni un’wana loyi u n’wi rhambeke leswaku a tilunghiselela ku va kona.
5. Xana swichudeni swa Bibele leswi nga si sungulaka ku ta eminhlanganweni hi nga swi khutaza njhani leswaku swi va kona eXitsundzuxweni?
5 Hi nga swi pfunisa ku yini swichudeni swa Bibele leswi nga si sungulaka ku hlanganyela leswaku swi vuyeriwa swinene eXitsundzuxweni? Tirhisa timinete ti nga ri tingani nkarhi hinkwawo loko mi dyondza, u pfuna xichudeni ha xin’we leswaku xi twisisa nkoka wa ku tlangela Xilalelo xa Hosi. Rungula leri baka nhloko ya mhaka leri u nga ri tirhisaka, ri kumeka eka Xihondzo xo Rindza xa March 15, 2004, matluka 3-7, ni le bukwini leyi nge Ku Hlamulana, matluka 416-19.
6. Ha yini swi ri swa nkoka ku amukela vaendzi lava teke eXitsundzuxweni?
6 Amukela Vaendzi: Hi siku ra Xitsundzuxo, amukela vaendzi, u bula na vona. (Rhom. 12:13) Tshama ni lava u va rhambeke, kutani loko va nga ri na Bibele ni buku ya tinsimu, va pfulele matsalwa eka ya wena u tlhela u yimbelela na vona. Vamakwerhu lava holeke kambe va endleke matshalatshala yo ta eXitsundzuxweni, hi fanele hi va amukela hi malwandla swinene. Loko va vona leswaku ha va tsakela, sweswo swi nga ha va pfuna leswaku va tlhela va sungula ku hlanganyela. (Luka 15:3-7) Eka xiendlakalo lexi, lexi kwetsimaka ngopfu, hinkwerhu a hi endleni hinkwaswo leswi hi nga swi kotaka leswaku hi khutaza van’wana va nkhensa Yehovha swin’we na hina hikwalaho ka ‘musa wakwe wa rirhandzu lowu hlamarisaka.’—Ps. 31:21.