Endla Leswinene Naswona U Avelana Ni Van’wana
1 Dorkasi “a a ri ni swiendlo swo tala leswinene naswona a a endla tinyiko to tala ta tintswalo.” (Mint. 9:36, 39) Moya wa yena wo hanana wu endle leswaku a rhandziwa hi Yehovha Xikwembu swin’we ni hi vanhu lava a va n’wi tiva. Vaheveru 13:16 yi ri: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” Namuntlha, xana hi nga swi endla hi ndlela yihi leswinene ni ku tlhela hi avelana ni van’wana?
2 Ndlela yin’wana leyi hi nga pfunaka van’wana ha yona i ku avelana na vona ‘swilo swa hina swa nkoka.’ (Swiv. 3:9) Minyikelo ya hina eka ntirho wa misava hinkwayo yi endla leswaku swi koteka ku aka Tiholo ta Mfumo, Tiholo ta Tinhlengeletano ni marhavi emisaveni hinkwayo. Ku hanana ka hina ku endle leswaku vanhu va timiliyoni va vuyeriwa eka swiletelo swa le tilweni ni vunakulobye lebyi akaka bya moya.
3 Ku Chavelelana: Loko ku va ni mhangu, vanhu va Yehovha va tshama va lunghekele ku ‘endlela vapfumeri-kulobye leswi nga swinene’ swin’we ni lava nga riki vapfumeri. (Gal. 6:10) Endzhaku ka ku buluka ka ndhawu ya tikhemikhali le Furwa, mpatswa wun’wana lowu a wu tshama ekusuhi ni ndhawu yoleyo wu te: “Vakreste-kulorhi va hatle va fika va ta pfuna ku susa thyaka endlwini ya hina ni le tindlwini ta van’wana emuakweni wolowo. Vaakelani va hina va hlamarile ku vona vanhu vo tala lava teleke ku ta hoxa xandla.” Makwerhu un’wana wa xisati u engetele a ku: “Vakulu va tile va ta hi pfuna ni ku hi khutaza. Kahle-kahle xikhutazo xexo hi xona lexi a hi xi lava ku tlula mpfuno wa swilo leswi vonakaka.”
4 Hambileswi ku nga ni tindlela to tala to endlela vaakelani va hina leswi nga swinene, ndlela leyi vuyerisaka swinene leyi hi nga va pfunaka ha yona i ku va dyondzisa vutivi bya risima bya ntiyiso, lebyi katsaka “ntshembo wa vutomi lebyi nga heriki” lebyi Yehovha hi byakwe a hi tshembiseke byona. (Tito 1:1, 2) Rungula ra Bibele ri nyika nchavelelo wa xiviri eka lava konyaka hikwalaho ka swiyimo swa misava ni xidyoho lexi va tswariweke na xona. (Mat. 5:4) Onge hi nga endla leswinene naswona hi avelana ni van’wana loko swi ri ematimbeni ya hina ku endla tano.—Swiv. 3:27.