‘Tiyimisele Ku Hanana, Avelana Ni Van’wana’
1 Malembe-xidzana lama hundzeke, muapostola Pawulo u lerise Timotiya ku khutaza vapfumeri-kulobye leswaku “va endla leswinene, va fuwa hi mintirho leyinene, va hanana, va tiyimisela ku avelana ni van’wana.” (1 Tim. 6:18) Pawulo u tlhele a tsundzuxa Vakreste va Vaheveru leswaku va nga rivali “ku endla leswinene ni ku avelana swilo ni van’wana.” (Hev. 13:16) Ha yini a tsale marito lawa? Hikuva a a swi tiva leswaku a swi ta tisa “ku vangama ni ku xiximeka ni ku rhula eka un’wana ni un’wana loyi a endlaka leswi nga swinene.”—Rhom. 2:10.
2 Hikwalaho ka leswi Yehovha Xikwembu a nga Muvumbi, i N’wini wa swilo hinkwaswo. (Nhlav. 4:11) Kunene ha swi tlangela swilo leswi a hi endlelaka swona hi swilo swakwe. Hambileswi vanhu vo tala va nga ni mukhuva wa ku nga nkhensi, La nge Henhla-henhla u hambeta a hi pfumelela hinkwerhu leswaku hi vuyeriwa eka malunghiselelo yakwe ya tintswalo yo kuma vutomi. (Mat. 5:45) U kale a endla xitlhavelo hi N’wana wakwe la rhandzekaka ngopfu, leswaku hi kota ku kuma vutomi lebyi nga heriki. Xana rirhandzu leri hi kombiweke rona a ri fanelanga ri hi susumetela ku nkhensa hi ku va lava hananaka eka vanhu-kulorhi?—2 Kor. 5:14, 15.
3 I Yini Leswi Hi Nga Hananaka Ha Swona? I swinene leswaku hi tirhisa xin’wana ni xin’wana lexi hi nga na xona hi ndlela leyi nga ta tsakisa Xikwembu. Kunene hi lava ku seketela ntirho wa Mfumo wa misava hinkwayo hi swilo leswi vonakaka ni hi tlhelo ra moya. Phela, mahungu lamanene i rifuwo ra nkoka leri un’wana ni un’wana a nga ri kumaka, hikuva “i matimba ya Xikwembu ya ku ponisa.” (Rhom. 1:16) Loko hi tirhisa nkarhi wa hina ni rifuwo ra hina hi ku swi rhandza n’hweti yin’wana ni yin’wana leswaku hi hlanganyela entirhweni wa ku chumayela ni ku dyondzisa, hi nga swi kota ku avelana ni van’wana rifuwo leri ra moya leswaku va kuma vutomi lebyi nga heriki.
4 Yehovha wa tsaka swinene loko hi pfuna lava pfumalaka. U hi tshembisa mikateko, naswona u tlhela a hi tsundzuxa a ku: “Swilo swa nkoka a swi nge pfuni nchumu hi siku ra ku hlundzuka, kambe ku lulama hi kona ku nga ta kutsula eku feni.” (Swiv. 11:4; 19:17) Ku seketela ntirho wa Mfumo hi swilo leswi vonakaka ni ku hlanganyela hi xitalo eku chumayeleni ka mahungu lamanene toleto i tindlela letinene leti hi nga kombisaka ha tona leswaku hakunene ha hanana naswona hi tiyimisele ku avelana ni van’wana.