Hambetani Mi Akana
1 Muapostola Pawulo u tirhe hi matimba leswaku a tiyisa vapfumeri-kulobye. (Mint. 14:19-22) Hilaha ku fanaka, na hina ha karhateka loko vamakwerhu va langutana ni swiyimo swo tika naswona hi lava ku va pfuna. Bibele yi kombisa leswaku ku khathalela vamakwerhu a hi ntirho wa vakulu ntsena kambe i wa hina hinkwerhu. (Rhom. 15:1, 2) Xiya tindlela timbirhi leti ha tona hi nga yingisaka ndzayo ya rirhandzu leyi nge: “Hambetani mi chavelelana, mi akana.”—1 Tes. 5:11.
2 Xiya Leswi Van’wana Va Swi Pfumalaka: Rito ra Xikwembu ri vula leswaku Dorkasi “a a ri ni swiendlo swo tala leswinene naswona a a endla tinyiko to tala ta tintswalo.” (Mint. 9:36, 39) A a xiya lava va nga ni swilaveko swo karhi kutani a va pfuna hilaha a kotaka hakona. Hakunene u hi vekele xikombiso lexinene! U nga ha twa leswaku ku ni makwerhu la dyuhaleke loyi a lavaka ku pfuniwa hi xo famba leswaku a kota ku ya eminhlanganweni. Kumbe ku nga va ku ri ni phayona leri lavaka loyi ri nga humaka na yena nsimu exikarhi ka vhiki. Loko u tiva makwerhu la lavaka mpfuno wo tano ivi u n’wi pfuna, hakunene u ta va u n’wi khutazile!
3 Mabulo Ya Swa Moya: Nakambe hi nga aka van’wana hi mavulavulelo ya hina. (Efe. 4:29) Nkulu la nga ni ntokoto u te: “Loko u lava ku va la khutazaka, vulavula hi swilo swa moya. U nga sungula bulo leri akaka hi ku vutisa xivutiso xo olova, u ku, ‘Xana u wu kume njhani ntiyiso?’” Khathalela vantshwa lava nga evandlheni hi mbilu ya wena hinkwayo. Pfuna lava heleke matimba ni lava va nga ni tingana. (Swiv. 12:25) U nga pfumeleli mabulo ya n’wina ya swa moya loko u ri swin’we ni vapfumeri-kuloni ma kavanyetiwa hi ku bula hi vuhungasi bya misava.—Rhom. 1:11, 12.
4 Kambe, i yini leswi u nga swi vulaka leswaku u aka van’wana? Loko u ri karhi u hlaya Bibele ni loko u endla dyondzo ya wena n’wini, xana u kume ndzayo yo karhi leyi dzikiseke ku tlangela ka wena milawu ya Yehovha? Xana yinhla yo karhi leyi u yi tweke eka nkulumo ya le rivaleni kumbe eka Dyondzo ya Xihondzo xo Rindza yi ku khutazile? Kumbe, xana u tsakisiwe hi ntokoto wo karhi lowu tiyisaka ripfumelo? Loko u teka timhaka to tano ta swa moya ti ri ta risima swinene, u ta tshama u ri ni swo karhi leswi khutazaka, leswi u nga swi avelaka van’wana.—Swiv. 2:1; Luka 6:45.
5 Onge hi nga hambeta hi aka van’wana hi ku va pfuna hi ndlela leyinene ni hi ku tirhisa ririmi ra hina hi vutlharhi.—Swiv. 12:18.