Xiyimiso Xa Ndyangu, Xa Ku Huma Nsimu Tanihi Ndyangu
1 Yehovha wa tsaka ku vona vantshwa va ri karhi va dzunisa vito rakwe. (Ps. 148:12, 13) Enkarhini wa Yesu hambi ku ri ‘swihlangi leswi an’waka a swi dzunisa’ Xikwembu. (Mat. 21:15, 16) Swi tano ninamuntlha. Vatswari, xana mi nga va pfuna njhani vana va n’wina leswaku va kula va ri karhi va hisekela ku dzunisa Yehovha entirhweni wa Vukreste? Nakambe, hilaha swi kandziyisiweke hakona eka xihloko lexi nga laha henhla xa mayelana ni minhlangano ya vandlha, xa nkoka swinene i xikombiso xa wena lexinene. Tatana un’wana loko a phofula leswi humelelaka eka vatswari vo tala, u te: “Ku tlula ka mhala ku letela n’wana wa le ndzeni!”
2 Makwerhu un’wana wa xisati la kurisiweke hi vatswari lava chavaka Xikwembu u ri: “Loko hi pfuka hi Mugqivela nimixo a hi nga kali hi vutisa leswaku ka yiwa ensin’wini ke. A hi swi tiva leswaku hi fanele hi ya.” Hilaha ku fanaka, na wena u nga pfuna vana va wena leswaku ntirho wo chumayela wu va engatini, hi ku hlela leswaku vhiki na vhiki mi tirha nsimu tanihi ndyangu. Leswi swi endla leswaku vana va wena va tekelela xikombiso wena, nakambe swi ku pfuna leswaku u xiya langutelo ra vona, mahanyelo ni nhluvuko wa vona.
3 Ndzetelo Lowu Hambetaka: Leswaku vana va rhandza nsimu, va fanele va pfuniwa leswaku va kota ku hlanganyela hi ndlela leyi humelelaka. Makwerhu wa xisati loyi a boxiweke eku sunguleni u tlhele a ku: “Vatswari va hina a hi nga va sali endzhaku ntsena loko va ya ensin’wini kambe na hina a hi hoxa xandla hi ku ba bele enyangweni ivi hi siyela n’wini wa muti xiphephana. Leswi a hi lunghiselela kahle hi nga si ya ensin’wini hi mahelo-vhiki man’wana ni man’wana, a hi swi tiva leswi hi nga ta swi vula.” Na wena u nga letela vana va wena hi ndlela yoleyo hi ku teka timinete ti nga ri tingani hi nkarhi wa dyondzo ya ndyangu kumbe hi nkarhi wun’wana, u va pfuna hi leswi va nga ta swi vula ensin’wini.
4 Ku chumayela swin’we tanihi ndyangu swi ku nyika nkarhi wo dyondzisa vana va wena ntiyiso. Tatana un’wana la nga Mukreste a a famba mpfhuka wa tikhilomitara ta khume swin’we ni xinhwanyetana xakwe va ya nyika vaaki va le ximutanini xin’wana swiphephana. Loko a swi tsundzuka u ri: “Endleleni yoleyo hi kona laha tatana a a dzikisa ntiyiso embilwini yanga.” (Det. 6:7) Onge na n’wina Xikwembu xi nga mi katekisa leswi exiyimisweni xa n’wina xa ndyangu xa vhiki na vhiki mi vaka ni nkarhi wo ya ensin’wini.