Hlakulela Ku Tsakela Hi Ku Hambeta U Yisela Munhu Timagazini
1. Xana hi nga ku hlakulela njhani ku tsakela eka vanhu lava hi hambetaka hi va yisela timagazini?
1 Vanhu vo tala lava hi hlanganaka na vona ensin’wini va tsaka loko hi va endzela, naswona va yi amukela minkandziyiso ya hina kambe va kanakana ku amukela dyondzo ya Bibele ya nkarhi na nkarhi. Ndlela yin’wana leyi hi nga hlakulelaka ku tsakela ka vona ha yona i ku hambeta hi va yisela timagazini. Loko u fambisa timagazini, tsala vito ra munhu loyi a tekeke magazini ni adirese yakwe, siku leri u n’wi fambiseleke magazini ha rona, timagazini leti a nga ti teka, tsalwa leri mi buleke ha rona ni swin’wana leswi u nga swi xiya leswi kombisaka leswaku wa tsakela. Loko ku fika timagazini letintshwa, lava tinhla leti nga ta tsakisa lava u hambetaka u va yisela timagazini, kutani u ya bula na vona ha tona loko u va endzela. (1 Kor. 9:19-23) Hi ku famba ka nkarhi, leswi va swi hlayeke eka timagazini ta hina swi nga va khumba timbilu kutani va lava ku tiva leswi engetelekeke.
2. Ha yini ku ri mhaka ya xihatla ngopfu leswaku vanhu va lava Yehovha sweswi, naswona i yini swin’wana leswi hi nga swi endlaka leswaku hi va pfuna?
2 Kambe ha swi tiva leswaku a va talanga vanhu lava nga ta hetelela va ri malandza ya Yehovha hi ku tihlayela timagazini ntsena. Leswi yi nga mhaka ya xihatla leswaku vanhu va lava Yehovha sweswi, xana hi nga endla yini swin’wana leswaku hi va pfuna? (Sof. 2:2, 3; Nhlav. 14:6, 7) Hi nga hlakulela ku tsakela loku va nga na kona hi ku va hlayela tsalwa ro karhi, nkarhi na nkarhi loko hi va yisela timagazini.
3. (a) Xana hi nga ri lunghiselela njhani bulo ra hina ra nkarhi na nkarhi, laha hi nga ta bula hi tsalwa rin’we ntsena? (b) Hi swihi swilo leswi vanhu va karhatekaka ha swona ensin’wini ya n’wina?
3 Ku Bula Hi Tsalwa Rin’we: Ehleketa hi vanhu lava u tshamelaka ku va yisela timagazini, kutani u lunghiselela matsalwa lama fanelanaka ni swilaveko swa vona, lawa u nga ta hlaya rin’we ra wona eka bulo ra n’wina ra nkarhi na nkarhi. (Filp. 2:4) Hi xikombiso, munhu la ha ku feriwaka hi munhu la n’wi rhandzaka, u nga ha vuyela eka yena minkarhi yo hlayanyana u bula na yena hi leswi Bibele yi swi vulaka hi vafi ni hi ntshembo wa ku pfuxiwa ka vafi. U nga tirhisa rungula leri nga ebukwini leyi nge Ku Hlamulana, ehansi ka xihloko lexi nge “Rifu” ni lexi nge “Mpfuko-wa-vafi,” loko u lunghiselela tsalwa leri u nga ta ri hlaya eka bulo ra n’wina ra nkarhi na nkarhi. Swin’wana leswi mi nga bulaka ha swona nkarhi na nkarhi leswi fambisanaka na bulo rolero, ku nga va ndlela leyi vuvabyi, ku dyuhala ni rifu swi nga ta herisiwa ha yona. Xikongomelo xa wena i ku kuma mhaka leyi nga ta tsakisa munhu ivi u hambeta u ya n’wi komba leswi Bibele yi swi vulaka hi yona.
4. Ha yini swi ri swa nkoka ku pfuna munhu leswaku a twisisa Matsalwa loko mi ri karhi mi bula ha wona, naswona hi nga swi endlisa ku yini sweswo?
4 Pfuna Munhu Leswaku A Twisisa: Hambileswi swi nga swinene ku komisa mabulo wolawo ni ku ma endla ma olova, u fanele u hlamusela ni swin’wana handle ko hlaya tsalwa leri u ri hlawuleke. Sathana u bvinye mianakanyo ya vanhu leswaku mahungu lamanene ma nga dziki emianakanyweni ya vona. (2 Kor. 4:3, 4) Hambi ku ri vanhu lava yi toloveleke Bibele na vona va fanele va pfuniwa ku yi twisisa. (Mint. 8:30, 31) Hikwalaho, teka nkarhinyana u hlamusela tsalwa leri mi bulaka ha rona u tlhela u endla xikombiso ha rona, ku fana nileswi u endlisaka xiswona loko u ri ni nkulumo eXikolweni xa Vutirheli bya le Tilweni. (Mint. 17:3) Tiyiseka leswaku munhu yoloye wa yi xiya ndlela leyi Rito ra Xikwembu ri n’wi pfunaka ha yona.
5. Xana u nga endla njhani leswaku munhu loyi u tshamelaka ku n’wi yisela timagazini a hetelela a dyondzeriwa Bibele?
5 Loko munhu a tsakela leswi a swi dyondzaka, hambeta u engetela matsalwa mambirhi kumbe manharhu eka riendzo rin’wana ni rin’wana. Lava ndlela yo dyondza na yena broxara leyi nge Leswi Xi Swi Languteleke kumbe buku leyi nge Vutivi. Hi ndlela yoleyo, munhu loyi u tshamelaka ku n’wi yisela timagazini a nga hetelela a dyondzeriwa Bibele.