Pfuna Vana Va Wena Va Endla Nhluvuko eNsin’wini
1 Vatswari lava nga Vakreste va ni vutihlamuleri lebyikulu byo letela vana va vona leswaku va sungula ku ya ensin’wini va ha ri vatsongo. Leswi va nga swi endla hi tindlela to hambana-hambana. Vana van’wana va swi kota ku yi tiva hi nhloko ndzimana leyi faneleke ya Bibele hambiloko va nga si swi kota ku hlaya. Munhu loyi a va yingiselaka swi nga n’wi khumba mbilu. Loko vana va ri karhi va kula, va nga hambeta va endla nhluvuko ensin’wini. Xana n’wina vatswari mi nga va pfuna njhani leswaku va hlanganyela eku chumayeleni? Kumbexana swiringanyeto leswi landzelaka swi nga va mpfuno.
2 Endzhaku ko xeweta, u nga ha ku:
◼ “N’wana wa mina, [vula vito ra yena], u mi khomele tsalwa ra nkoka leri a tsakelaka leswaku mi ri twa.” N’wana wa wena a nga ha ku: “Tsalwa leri ra Pisalema ri ndzi dyondzise vito ra Xikwembu. [N’wana u hlaya Pisalema 83:18 kumbe a yi vula hi nhloko.] Timagazini leti ti vulavula hi leswi Yehovha Xikwembu a nga ta hi endlela swona. Xana ndzi nga mi siyela tona?” U nga ha gimeta bulo hi ku hlamusela ndlela leyi ntirho wa misava hinkwayo wu sekeriwaka ha yona.
3 Kumbe u nga ha ringeta xingheniso lexi:
◼ “Xewani. Ndzi dyondzisa n’wana wa mina [vula vito ra yena], leswaku a rhandza vanhu va ndhawu leyi. U ta mi byela rungula ro koma ra Bibele.” N’wana a nga ha ku: “Ndlela yin’wana leyi ndzi rhandzaka ku pfuna vanhu ha yona i ku va byela leswi Bibele yi swi tshembisaka hi ta vumundzuku. [N’wana u hlaya Nhlavutelo 21:4 kumbe a yi vula hi nhloko.] Timagazini leti ti hlamusela leswi Mfumo wa Xikwembu wu nga ta hi endlela swona. Ndzi ehleketa leswaku u ta tsakela ku ti hlaya.”
4 Loko nkarhi na nkarhi u tirhisa xingheniso xo olova swi ta endla vana va va ni xivindzi xo chumayela rungula ra Mfumo. Ku va toloveta ku vulavula kahle naswona va vulavulela ehenhla swi ta va hlomisela ku vulavula eka swiyimo swo hambana-hambana. Ku lunghiselela kahle ka ha ri emahlweni ni ku va bumabumela swi ta va pfuna leswaku va phofula ripfumelo ra vona.
5 Hikwalaho ko khutaziwa hi ndlela yoleyo, vana vo tala va kote ku fanelekela ku va vahuweleri lava nga khuvuriwangiki. Mawaku ntsako lowu hi vaka na wona loko hi vona vana va hina va endla nhluvuko ensin’wini!—Ps. 148:12, 13.