Nongonoko Lowuntshwa Wa Nhlengeletano Ya Xifundzha

Emasikwini lawa yo hetelela ya misava leyi ya khale leyi onhakeke i swa nkoka leswaku hi sirhelela tinguvu ta hina ta moya ni ku tshama hi tiviwa tanihi Vakreste. (Nhlav. 16:15) Swi fanerile leswi nhloko-mhaka ya nongonoko wa nhlengeletano ya xifundzha ya lembe ra ntirho ra 2006 yi nge “Ambala Vumunhu Lebyintshwa.”—Kol. 3:10.

Siku Ro Sungula: Nxaxamelo wo sungula wa tinkulumo to sungula to siyerisana, lowu nge “Ku Kombisa Timfanelo Ta Vumunhu Lebyintshwa,” wu ta kandziyisa ndlela leyi ku hlakulela vumunhu lebyintshwa swi nga hi vuyerisaka ha yona evuton’wini bya hina hinkwabyo. Xana hi byi hlakulela njhani vumunhu lebyintshwa? Sweswo swi ta hlamuseriwa eka tinkulumo timbirhi to hetelela ta siku ro sungula, leyi nge “Tidyondzise Ndlela Leyinene Yo Anakanyisisa” ni leyi nge “Dyondzo Leyi Hi Pfunaka Ku Aka Vumunhu Lebyintshwa.”

Siku Ra Vumbirhi: Eka nxaxamelo wa vumbirhi wa tinkulumo to siyerisana leti nga ni nhloko-mhaka leyi nge “Hlakulela Ku Va Ni Ririmi Ra Lavo Tlhariha” ku ta hlamuseriwa ndlela leyi vumunhu lebyintshwa byi nga yi khumbaka ha yona ndlela leyi hi ri tirhisaka ha yona ririmi ra hina. Nkulumo ya le rivaleni leyi nga ni nhloko-mhaka leyi nge “Xana Wa N’wi Hlula Lowo Homboloka?” yi ta kandziyisa xilaveko xo tshama hi xalamukele marhengu ya Sathana. Tinkulumo timbirhi to hetelela ta nhlengeletano, leyi nge “Tshama U Nga Ri Na Xivati Xa Misava” ni leyi nge “Ku Pfuxeta Munhu Loyi Hi Nga Yena Endzeni Siku Rin’wana Ni Rin’wana,” ti ta hi pfuna ku papalata malangutelo ni mahanyelo lama lwisanaka ni tindlela ta Xikwembu to lulama ni ku tshama hi tiyile evugandzerini bya Yehovha.

Hakunene hi swi langutele hi mahlo-ngati ku nyikiwa xikhutazo lexi xa ku ambala vumunhu lebyintshwa hi nga byi hluvuli!