Leswi Hi Nga Swi Vulaka Hi Timagazini

Xihondzo xo Rindza Apr. 15

“Vanhu vo tala va pfumela leswaku xin’wana xa swilotlelo swa ntsako endyangwini i mbulavurisano lowunene, kambe va tele lava swi va tikelaka ku burisana kahle. Xana u ehleketa leswaku sweswo swi vangiwa hi yini? [Yimela nhlamulo.] Magazini lowu wu ni swiringanyeto leswi nga hi pfunaka leswaku hi va ni mbulavurisano lowunene.” Hlaya Yakobo 1:19.

Xalamuka! Apr.

“Vanhu vo tala va vula leswaku xihambano xi va pfuna leswaku va titwa va ri ekusuhi ni Xikwembu. Hambiswiritano, van’wana va tivutisa leswi: Xana swi fanerile ku xixima nchumu lowu tirhisiweke ku dlaya Yesu? Xana hakunene Yesu u fele exihambanweni? Xihloko lexi sungulaka eka tluka 12 xi tlhuvutsa swivutiso leswi hi ku ya hi langutelo ra Bibele.” Hlaya Mintirho 5:30.

Xihondzo xo Rindza May 1

“Vanhu va timiliyoni emisaveni hinkwayo va le vuswetini. Xana u ehleketa leswaku va nga pfuniwa njhani? [Yimela nhlamulo. Kutani u hlaya 1 Petro 2:21.] Magazini lowu wu hlamusela ndlela leyi hi nga swi khathalelaka ha yona swisiwana, hi tekelela xikombiso xa Yesu.”

Xalamuka! May

“Xana u tshama u tivutisa leswaku ha yini hi dyuhala? [Yimela nhlamulo.] Bibele yi hi byela leswaku ha yini hi dyuhala yi tlhela yi hi byela leswi Xikwembu xi swi endleke leswaku hi kota ku tiphina hi vutomi hilaha ku nga heriki. [Hlaya Esaya 25:8.] Xalamuka! leyi yi hlamusela swin’wana swa leswi vuriwaka manguva lawa hi ta ku dyuhala ka vanhu.”