Va Veke Xikombiso Lexinene Xa Vutshembeki

¹ Hi 1937 ku sungule muxaka lowuntshwa wa ntirho wa nkarhi hinkwawo, ku nga vuphayona byo hlawuleka. Vavanuna ni vavasati, lava fanelekaka lava nga ni ntokoto entirhweni wa nsimu va swi amukele hi mandla mambirhi swiavelo swo ya tirha kun’wana ni kun’wana laha nhlengeletano yi va rhumelaka kona. Nisweswi, endzhaku ka makume ya malembe, maphayona yo hlawuleka ma ha ya emahlweni ma ri xikombiso xa vutshembeki lebyi faneleke byi tekeleriwa.—Hev. 6:12.

² Va Rhangerile: Ku sukela eku sunguleni maphayona yo hlawuleka ma sungule ntirho wo chumayela hi ku tlangela n’wini wa muti gramafoni. A ma endla tano ni le ka maendzo yo vuyela. Leswi a swi endliwa emadorobeni lamakulu laha se a ku ri ni mavandlha. Hi ku famba ka nkarhi, maphayona yo hlawuleka ma rhumeriwe etindhawini leti eka tona a ku ri ni xilaveko lexikulu xa vahuweleri va Mfumo. A ma tlhelela eka hinkwavo lava tsakelaka kutani ma fambisa tidyondzo ta Bibele. Hikwalaho ka matshalatshala lawa maphayona ma ma endleke hi ku gingiriteka, ku simekiwe madzana ya mavandlha. Ntirho wa wona wo twarisa mahungu lamanene hi wona wu endleke leswaku ku va ni ku andza lokukulu enhlengeletanweni leyi hi yi vonaka namuntlha. (Esa. 60:22) Maphayona yo hlawuleka ma hambeta ma endla ntirho lowukulu wo twarisa mahungu lamanene “eka ntumbuluko hinkwawo lowu nga ehansi ka tilo.”—Kol. 1:23.

³ Hi Fanele Hi Tekelela Xikombiso Xa Wona: Maphayona man’wana yo hlawuleka ma ni makume ya malembe ma ri karhi ma phayona. Se i malembe ripfumelo ra vavanuna ni vavasati lava ri ri karhi ri tengisiwa ehansi ka swiyimo swo hambana-hambana. (1 Pet. 1:6, 7) Va tiyimisele ku tshika ku tiphina hi rifuwo leswaku va ya tirha etindhawini leti nga ni xilaveko lexikulu xa vahuweleri. Van’wana malembe se ma fambile naswona rihanyo ra vona a ri nyawuli, kumbe va langutana ni swiyimo swin’wana swo tika. (2 Kor. 4:16, 17) Kambe, va “hambeta va humelela niloko va ri timpunga.” (Ps. 92:14) Va tshembe Yehovha naswona wa va katekisa.—Ps. 34:8; Swiv. 10:22.

⁴ Hakunene swa fanela leswaku hi bumabumela maphayona yo hlawuleka. Loko vandlha ra n’wina ri ve ni lunghelo ro averiwa maphayona yo hlawuleka, hetani nkarhi wo tala swin’we na wona leswaku mi ta vuyeriwa eka mintokoto ya wona. Tlangelani ntirho wa wona tanihi leswi ma huwelelaka Mfumo hi ku tshembeka. Ndlela leyi ma tserhameke ha yona yi ta mi tiyisa. Yehovha u ta va katekisa hinkwavo lava tekelelaka ripfumelo ra wona, hikuva “lava va endlaka hi ku tshembeka va n’wi tsakisa.”—Swiv. 12:22.