Bokisi Ra Swivutiso

◼ Hi tihi tindlela leti hi nga pfunaka maphayona ha tona?

Emisaveni hinkwayo hi lembe ra ntirho ra 2009, vamakwerhu va kwalomu ka 800 000 a va tirha tanihi maphayona ya nkarhi hinkwawo ni yo hlawuleka. Malandza lawa ya nkarhi hinkwawo ma tirhisa swirhangana swa nkarhi wa wona, matimba ni swilo wa wona leswi vonakaka leswaku ma hangalasa mahungu lamanene ya Mfumo. (Swiv. 3:9) Hakunene matshalatshala ya wona ma n’wi tsakisa Yehovha! Hi yihi ndlela leyi hi nga tekelelaka vonelo ra Yehovha ha yona naswona hi endla leswaku ma tsaka ma tlhela ma tiyisela eka ntirho wa wona?

Marito ya hina lama hlawuriweke kahle ma nga va khutaza leswaku va ya emahlweni va tirha tinihi maphayona. (Swiv. 25:11) Xana hi nga swi kota ku antswisa xiyimiso xa hina xa vhiki na vhiki leswaku hi kota ku tirha na vona evutirhelini? Loko hi tirha na vona hi nga ringanyeta leswaku hi tirhisa timovha ta hina ematshan’weni ya ta vona. Kumbexana loko hi famba na vona hi timovha ta vona hi nga va nyika mali yo karhi leswaku va kota ku hakelela swilaveko swa movha. (1 Kor. 13:5; Filp. 2:4) Nakambe hi kombisa nseketelo wa hina wa rirhandzu hi ku kombisa malwandla naswona minkarhi yin’wana hi rhamba maphayona emakaya ya hina leswaku hi ta dya swin’we.—1 Pet. 4:8, 9.

Matsalwa ma hi tiyisekisa leswaku Yehovha u ta khathalela swilaveko swa lava lavaka Mfumo ku sungula. (Ps. 37:25; Mat. 6:33) Ndlela yin’wana u tirhisa Vamakwerhu lava nga Vakreste. (1 Yoh. 3:16-18) I ntiyiso leswaku maphayona a ma rindzelanga leswaku swilaveko swa wona swa timali swi khathaleriwa hi van’wana. Nakambe a ma tivisi van’wana loko ma kayiveriwa hi swona karhi. Hambiswiritano, loko hi xalamuka naswona hi va ni vuxiya-xiya hi nga pfuna maphayona yo tshembeka hi ku kongoma naswona hi “pfala ku kayivela ka [wona].”—2 Kor. 8:14, 15.

Loko muhuweleri loyi a hisekaka loyi a vuriwaka Febe wa lembe-xidzana ro sungula evandlheni ra Kenikreya a ye eRhoma, Pawulo u khutaze vamakwerhu va le Rhoma a ku: “Mi n’wi amukela eHosini hi ndlela leyi fanelaka vakwetsimi, . . . mi n’wi pfuna emhakeni yihi ni yihi leyi a nga lavaka mi n’wi pfuna eka yona.” (Rhom. 16:1,  2) Hi na nkarhi lowu hi pfulekeleke leswaku hi kombisa nseketelo wa rirhandzu eka lava va nga evandlheni lava chumayelaka mahungu lamanene handle ko karhala tanihi maphayona ya nkarhi hinkwawo ni yo hlawuleka.—Mint. 5:42.