Nkandziyiso Wo Hlawuleka Wa Xalamuka! Lowu Nga Ta Fambisiwa Hi September
1 Un’wana ni un’wana wa swi tsakela ku twa swinyenyana loko swi yimbelela ni ku hlalela dyambu loko ri pela. Hambiswiritano, vo tala a va pfumeli leswaku Tatana wa rirhandzu la nge tilweni hi yena la vumbeke swilo leswi. Hi ta va ni lunghelo ro hlawuleka ro humesa vumbhoni bya leswaku Yehovha hi yena Muvumbi hi ku fambisa nkandziyiso wo hlawuleka wa Xalamuka! (Esa. 40:28; 43:10) Nkandziyiso wa September wu vulavula ngopfu hi xihloko lexi nge “Xana Ku Ni Muvumbi?”
2 Ensin’wini: Loko swi koteka, hlela leswaku Mugqivela wun’wana ni wun’wana u tirha swin’we ni vandlha hi yindlu na yindlu. Ina, ni le xikarhi ka vhiki u nga ha fambisa nkandziyiso lowu wo hlawuleka. Vadyondzisi ni van’wana lava tirhaka endzawulweni ya dyondzo va ta wu tsakela ngopfu nkandziyiso lowu. Hikwalaho, ku nga endliwa malunghiselelo yo hlawuleka leswaku ku endzeriwa vanhu vo tano ensin’wini ya n’wina.
3 Loko munhu a tsakela, n’wi siye ni xivutiso lexi u nga ta xi hlamula loko u tlhela u n’wi endzela. Hi xikombiso, u nga ha vutisa xivangelo xa ku va Muvumbi wa rirhandzu a pfumelela ku xaniseka konghasi. Kutani loko u vuyela, mi nga ha bula hi ndzima 1 kumbe ndzima 11 ya buku leyi nge Leswi Bibele Yi Swi Dyondzisaka. Kumbe u nga ha hlawula ku n’wi vutisa xivutiso malunghana ni xikongomelo xa Muvumbi hi misava, kutani loko u tlhelela eka yena mi bula hi ndzima 3.
4 Exikolweni: Loko u nghena xikolo, ha yini u nga nyiki vadyondzisi ni swichudeni-kuloni Xalamuka! leyi yo hlawuleka tanihi nyiko? Loko u yi veke ehenhla ka desika ra wena yi nga ha va endla va vutisa swivutiso hi ta ripfumelo ra hina. U ta va ni nkarhi lowunene wo tirhisa rungula ra yona loko u ri karhi u lwela ripfumelo ra wena eka mabulo ya le tlilasini kumbe loko u tsala xitsalwana xo karhi. Nkandziyiso lowu wu ni xihloko xin’wana lexi nga ku pfunaka ehansi ka nhloko-mhaka leyi nge “Vantshwa Va Vutisa” xi ri “Ndzi Nga Yi Sekela Njhani Mhaka Ya Leswaku Hinkwaswo Leswi Hanyaka Swi Lo Tumbuluxiwa?”
5 Yehovha u faneriwa hi ku xiximiwa ni ku dzunisiwa hikwalaho ka swilo leswi a swi vumbeke. (Nhlav. 4:11) Hi nga xixima Muvumbi wa hina hi tlhela hi pfuna van’wana leswaku na vona va endla tano hi ku va hi wu fambisa hi ku hiseka nkandziyiso lowu wa Xalamuka! ya September.