Nkandziyiso Wo Hlawuleka Wa Xalamuka! Lowu Nga Ta Fambisiwa Hi November!
1 Vanhu vo tala va lava ku tiva loko Bibele yi ri ya nkoka hakunene. Va tivutisa leswaku, loko Bibele yi tsariwe hi vanhu, ha yini yi vitaniwa Rito ra Xikwembu? Ha yini va fanele va tshemba leswaku Bibele yi ta va kongomisa? Xana va ta vuyeriwa hi yini loko va heta nkarhi va ri karhi va hlaya Bibele ni ku yi dyondza? Hi byihi vuhundzuluxeri bya Bibele lebyi va faneleke va byi tirhisa? Leswi hi swin’wana swa swivutiso leswi hlamuriwaka hi nkandziyiso wo hlawuleka wa Xalamuka! ya November leyi nga ni xihloko lexi nge “Xana Wa Swi Tshemba Leswi Bibele Yi Swi Vulaka?”
2 Hi fanele hi wu fambisa swinene nkandziyiso lowu wo hlawuleka wa Xalamuka! ensin’wini ya hina. Loko swi koteka, hlanganyela ni vandlha eka ntirho wa yindlu ni yindlu Mugqivela wun’wana ni wun’wana hi n’hweti ya November. Wu fambisele maxaka ya wena, vaakelani, vatirhi-kuloni, vadyondzisi, vadyondzi-kuloni ni lava u endlaka maendzo yo vuyela eka vona. Famba ni tikopi ta wona loko u ya eku xaveni ni loko u teka riendzo. Rhavi ri rhumele tikopi leti engetelekeke leswaku vandlha ri ta va ni mphakelo lowu ringaneke.
3 Sungula Dyondzo Ya Bibele: Loko u fambisa magazini, u nga ha andlala masungulo ya dyondzo ya Bibele u nga si gimeta bulo ra wena. Hi xikombiso, u nga ha ku, “Loko ndzi vuya, ndzi ta tsakela ku ku komba nhlamulo leyi humaka eBibeleni ya xivutiso lexi nge, ‘Hi xihi xikongomelo xa Xikwembu hi misava?’” Kutani u tlhelela ni buku leyi nge Leswi Bibele Yi Swi Dyondzisaka kutani u komba n’wini wa muti matluka 4-5, kumbe mi bula hi tindzimana 1-3 ta ndzima 3. Kasi loko u swi lava u nga ha ku, “Loko ndzi vuya, ndzi ta tsakela ku bula hi vuprofeta bya Bibele lebyi hetisekaka sweswi.” Loko u tlhelela, komba n’wini wa muti ndzima 9 ya buku naswona mi bula swin’we hi tindzimana 1-3. Kumbe u nga ha byela n’wini wa muti u ku: “Vo tala swa va tikela ku twisisa leswi va swi hlayaka eBibeleni. Loko ndzi vuya, ndzi ta tsakela ku ku komba ndlela leyi u nga yi twisisaka ku antswa ha yona Bibele ya wena.” Loko u tlhelela, n’wi fambisele buku leyi nge Leswi Bibele Yi Swi Dyondzisaka kutani u n’wi komba ndlela leyi dyondzo yi fambisiwaka ha yona.
4 I Bibele ntsena leyi tameleke “matsalwa yo kwetsima” lama kotaka ku hi ‘tlharihisa leswaku hi ta pona.’ (2 Tim. 3:15) Hikokwalaho, hinkwerhu ka hina hi ta lava ku hisekela ku fambisa nkandziyiso lowu wo hlawuleka wa Xalamuka! leswaku hi pfuna vanhu va tshemba Bibele!