Vhidiyo Leyi Ku Faneleke Ku Anakanyisisiwa Ha Yona
“Hakunene vhidiyo leyi yi ku endla u tivutisa swo tala!”
“Yi hatle yi fikelela mbilu ya mina!”
“Yi ndzi khumbile swinene!”
1 Xana hi yona ndlela leyi u nga titwa ha yona loko u yi hlalela ro sungula vhidiyo leyi nge Young People Ask—How Can I Make Real Friends? Eka malembe lama hundzeke, makwerhu un’wana wa xinuna la ha riki muntshwa u koke ku tika hikwalaho ka vanghana lava a nga tihlawulela vona. Va n’wi kuceterile kutani a nga ha wu tsakeli ntiyiso ivi a dlaya vuxaka bya yena na Yehovha. Hiloko ku humesiwa vhidiyo leyi nge Real Friends. U tsale a ku: “Loko ndzi ri karhi ndzi yi hlalela hi ku phindha-phindha, a ndzi xiririka mihloti. Ndzi nkhense Yehovha leswi a ndzi pfuneke hi nkarhi lowu faneleke.” Vhidiyo leyi yi n’wi susumetele ku cinca vutomi bya yena ni leswaku a kuma vanghana lavanene. U tlhele a ku: “Swi le rivaleni leswaku n’wina lava humeseke vhidiyo leyi mi swi tiva kahle leswi kucetelaka vantshwa.” Vatswari ni vantshwa, ha yini mi nga hlaleli vhidiyo leyi nakambe eka dyondzo ya n’wina ya ndyangu leyi landzelaka? Yi yimiseni endzhaku ka xiphemu xin’wana ni xin’wana, mi bula hi swivutiso leswi nga eka tindzimana leti landzelaka, mi ntshunxekile naswona mi phofula ta le mbilwini.
2 Xingheniso: Xana munghana lonene i yini?—Swiv. 18:24.
3 Swihinga Swa Vunghana: Xana u nga xi hlula njhani xiphiqo xa ku titwa u nga laviwi? (Filp. 2:4) Ha yini u fanele u navela ku antswisa vumunhu bya wena, naswona i mani la nga ku pfunaka ku endla tano? I yini leswi nga ta ku pfulela lunghelo ro kuma vanghana vo tala naswona u nga va kuma kwihi?—2 Kor. 6:13.
4 Ku Va Munghana Wa Xikwembu: Xana u nga byi hlakulela njhani vunghana na Yehovha naswona ha yini ku endla tano swi lava matshalatshala? (Ps. 34:8) Xana i mani la nga byi tiyisaka swinene vunghana bya wena ni Xikwembu?
5 Vanghana Lava Nga Riki Vanene: Hi vahi vanghana vo biha? (1 Kor. 15:33) Xana vanghana vo biha va nga byi onha njhani vumoya bya munhu? Xana ri ku dyondzisa yini rungula ra Dina leri kumekaka eBibeleni?—Gen. 34:1, 2, 7, 19.
6 Drama Ya Manguva Lawa: Xana xivundza xi n’wi khumbe njhani Tara? Hi swihi swivangelo leswi a swi nyikeleke swa ku va a endle vunghana ni vantshwa va misava? Hi rihi khombo leri va laveke ku n’wi hoxa eka rona? Ha yini vatswari va yena va nga ri vonanga khombo leri a a langutane na rona, kambe va n’wi pfune njhani leswaku a hlakarhela emoyeni? Xana phayona ri ve munghana wa xiviri wa Tara hi ndlela yihi? Ha yini Vakreste va fanele va yingisa tsalwa ra Swivuriso 13:20 ni ra Yeremiya 17:9? Hi yihi dyondzo ya nkoka leyi Tara a yi dyondzeke?
7 Mahetelelo: Xana u dyondze yini eka vhidiyo leyi? Xana u nga yi tirhisa njhani ku pfuna van’wana?—Ps. 71:17.