“Loyi A Karhaleke U N’wi Nyika Matimba”
1 Hinkwerhu ka hina minkarhi yin’wana ha karhala. Hi nga va hi nga karharisiwi hi ntirho kumbe hi swin’wana leswi hi swi endlaka kambe hi karharisiwa hi swiphiqo leswi hi langutanaka na swona ‘eminkarhini leyi ya mangava leyi swi nonon’hwaka ku langutana na yona.’ (2 Tim. 3:1) Tanihi malandza ya Yehovha, xana hi ma kuma njhani matimba ya moya lama lavekaka leswaku hi nga tshiki ntirho wo chumayela? Hi ma kuma hi ku titshega hi Yehovha la nga ni “matimba lamakulu.” (Esa. 40:26) Wa swi tiva leswi hi swi kayivelaka naswona u swi tsakela ngopfu ku hi pfuna.—1 Pet. 5:7.
2 Malunghiselelo Ya Yehovha Yo Hi Pfuna: Yehovha wa hi tiyisa hi moya wa yena lowo kwetsima, ku nga wona matimba lamakulu lawa a ma tirhiseke loko a vumba vuako hinkwabyo. Moya wa Xikwembu wu hi pfuna ku ‘tlhela hi kuma matimba’ loko ho tshuka hi karhala. (Esa. 40:31) Tivutise leswi, ‘Xana ndzi hetelele rini ku kombela moya lowo kwetsima hi ku kongoma leswaku wu ndzi tiyisa leswaku ndzi kota ku endla mintirho ya mina tanihi Mukreste?’—Luka 11:11-13.
3 Loko hi hlaya Rito ra Xikwembu leri huhuteriweke hi tlhela hi anakanyisisa ha rona naswona hi tiwundla hi tlhelo ra moya hi ku dyondza tibuku ta hina ta Vukreste nkarhi na nkarhi, hi ta fana ni “murhi lowu byariweke etlhelo ka swinambyana swa mati, lowu humesaka mbhandzu wa wona hi nguva ya kona, lowu switluka swa wona swi nga vuniki.”—Ps. 1:2, 3.
4 Nakambe Yehovha u tirhisa vapfumeri-kulorhi, lava nga ‘mpfuno lowu tiyisaka’ eka hina. (Kol. 4:10, 11) Va hi tiyisa eminhlanganweni ya vandlha hi mabulo lama akaka, hi tinhlamulo ni hi tinkulumo leti va ti nyikelaka. (Mint. 15:32) Vakulu ngopfu-ngopfu va hi pfuna hi tlhelo ra moya naswona va hi khutaza swinene.—Esa. 32:1, 2.
5 Nsimu: Loko u titwa u karhele, u nga tshiki ku chumayela! Entiyisweni, ntirho wa nsimu wa hi phyuphyisa loko hi wu endla nkarhi na nkarhi hikuva a wu fani ni mintirho leyin’wana. (Mat. 11:28-30) Ku chumayela mahungu lamanene swi hi pfuna leswaku hi tshama hi ri karhi hi ehleketa hi Mfumo wa Xikwembu ni hi mikateko ya hilaha ku nga heriki.
6 Wa ha ri wukulu ntirho lowu hi faneleke hi wu endla, mafambiselo lawa yo biha ma nga si herisiwa. Hi ni xivangelo lexinene xa ku phikelela entirhweni wa hina, hi ri karhi hi “titshege hi ntamu lowu Xikwembu xi wu nyikaka.” (1 Pet. 4:11) Leswi Yehovha a hi pfunaka, ntirho wa hina hi ta wu heta hikuva “loyi a karhaleke u n’wi nyika matimba.”—Esa. 40:29.