‘Ku Wundliwa Hi Marito Ya Ripfumelo’
1 Leswaku munhu a hanya vutomi bya ku tinyiketela eka Xikwembu swi lava leswaku a tikarhata swinene. (1 Tim. 4:7-10) Loko hi ringeta ku hanya hi ndlela yoleyo handle ka ku pfuniwa hi Xikwembu hi ta karhala hi nga si ya kule kutani hi khunguvanyeka. (Esa. 40:29-31) Ndlela yin’wana yo kuma matimba yo huma eka Yehovha, i ku va hi ‘wundliwa hi marito ya ripfumelo.’—1 Tim. 4:6.
2 Swakudya Swa Moya Leswi Fuweke: Yehovha u hi phamela swakudya leswi fuweke swa moya hi ku tirhisa Rito rakwe ni “hlonga ro tshembeka ni ro tlhariha.” (Mat. 24:45) Xana swakudya sweswo ha swi dya leswaku hi wundleka emoyeni? Xana masiku hinkwawo ha yi hlaya Bibele? Xana hi tivekele nkarhi wa dyondzo ya hina vini ni wo anakanyisisa? (Ps. 1:2, 3) Swakudya swa moya leswi swi fuweke swa hi wundla ni ku hi sirhelela leswaku hi nga tsanisiwi hi miringo ya misava ya Sathana. (1 Yoh. 5:19) Loko hi wundla mianakanyo ya hina hi swilo leswi akaka naswona hi swi tirhisa evuton’wini bya hina, Yehovha u ta va na hina.—Filp. 4:8, 9.
3 Nchumu wun’wana lowu Yehovha a hi tiyisaka ha wona i minhlangano ya vandlha. (Hev. 10:24, 25) Ndzetelo wa moya ni ku va ni vunghana lebyinene ni vanhu va Xikwembu eminhlanganweni leyi, swa hi tiyisa leswaku hi kota ku tiyisela loko hi ringiwa. (1 Pet. 5:9, 10) Muntshwa un’wana la nga Mbhoni u te: “Ndzi heta siku hinkwaro ndzi ri exikolweni, naswona swi ndzi heta matimba. Kambe minhlangano yi fana ni xihlovo xa mati emananga, ya ndzi phyuphyisa leswaku ndzi kota ku tiyisela loko ndzi ri exikolweni hi xamundzuku.” Hakunene ha katekisiwa eka matshalatshala lawa hi ma endlaka leswaku hi va kona eminhlanganweni nkarhi hinkwawo!
4 Ku Twarisa Ntiyiso: Eka Yesu ku dyondzisa vanhu a ku fana ni swakudya. A ku n’wi nyika matimba. (Yoh. 4:32-34) Hi ndlela yoleyo, loko na hina hi vulavula ni van’wana hi switshembiso swa Xikwembu leswi tsakisaka, hi titwa hi ri ni matimba. Loko hi khomekile hi ntirho wa nsimu hi tshama hi ri karhi hi anakanya hi timhaka ta Mfumo ni mikateko leyi hi nga ta yi kuma ku nga ri khale. Sweswo swa hi phyuphyisa hakunene!—Mat. 11:28-30.
5 Mawaku lunghelo ronghasi ro wundliwa hi swakudya swa moya leswi Yehovha a swi phamelaka vanhu vakwe namuntlha! A hi hambeteni hi n’wi dzunisa hi tsakile.—Esa. 65:13, 14.