“Hlomisiwa Hi Ku Helela Eka Ntirho Wun’wana Ni Wun’wana Lowunene”
1 Vanhu va Yehovha namuntlha va katekisiwa hi ndzalo ya swakudya swa moya leswi fuweke. (Esa. 25:6) Ku ni marungula yo tala ya Matsalwa lawa hi nga tiphinaka ha wona hi ku tirhisa dyondzo ya munhu hi xiyexe ni ya ndyangu ni ku ya eminhlanganweni ya vandlha, etinhlengeletanweni ni le mintsombanweni. Kambe xana hi tirhisa swilo leswi hi xitalo ni ku lunghekela ku “hlomisiwa hi ku helela eka ntirho wun’wana ni wun’wana lowunene”?—2 Tim. 3:17.
2 Anakanya hi swakudya swa moya leswi lunghiseleriweke lembe ra 1998, leri ana se ri fikeke exikarhi! Eminhlanganweni ya vandlha ya vhiki na vhiki, hi kuma tinhla-nkulu ta tibuku ta 23 ta Matsalwa ya Vukreste ya Xigriki, hi kambisisa rungula leri kumekaka eka xiyenge lexi nge Tinhloko-mhaka To Vulavurisana, ni ku dyondza matluka ya 138 ya buku leyi nge Vahuweleri. Nakambe hi dyondze n’we-xa-nharhu xa buku leyi nge Vutivi, kwalomu ka buku hinkwayo leyi nge Ntsako eNdyangwini, ni buku hinkwayo leyi nge Rito Ra Xikwembu. Ku engetela kwalaho, hi phameriwa hi minkandziyiso ya 12 ya Vutirheli Bya Hina Bya Mfumo, tinhloko-mhaka ta tidyondzo ta Xihondzo xo Rindza to ringana 52, ni tinkulumo to tala ta le rivaleni leti vulavulaka hi timhaka to hambana-hambana ta Bibele. Minongonoko leyi fuweke ya ntsombano ni tinhlengeletano yi engetela mphakelo lowu. Mawaku ndzalo leyi fuweke ya swilo leswinene swa moya leyi hi nyikiweke yona!
3 Tlangela Malunghiselelo Ya Yehovha: Leswaku hi vuyeriwa hi xitalo, hi fanele hi swi twisisa leswaku ha yini Yehovha a hi nyika ndzalo yo tano ya swakudya swa moya. Ku dya swakudya leswi leswinene swi aka ripfumelo ra hina ni ku tiyisa vuxaka bya hina na yena. (1 Tim. 4:6) Hambiswiritano, swakudya leswi swa moya a swi lunghiseleriwanga ku hi letela ntsena. Swi hi susumetela ku byela van’wana ntiyiso ni ku hi hlomisela ku va lava humelelaka tanihi vatirheli va mahungu lamanene.—2 Tim. 4:5.
4 Hi nga swi honisi swilaveko swa hina swa moya, kambe nkarhi hinkwawo a hi hlakuleleni ku navela malunghiselelo ya swakudya swa moya leswi fuweke ni leswi nandzihaka leswi humaka etafuleni ra Yehovha. (Mat. 5:3; 1 Pet. 2:2) Leswaku hi vuyeriwa hi xitalo, ku laveka leswaku hi tivekela nkarhi lowu ringaneleke leswaku hi kuma timhaka to tano ta nkoka to tanihi dyondzo ya Bibele ya munhu hi xiyexe ni ya ndyangu ni ku ya eminhlanganweni. (Efe. 5:15, 16) Vuyelo lebyi tsakisaka bya ku endla tano byi ta fambisana ni xikhutazo lexi huhuteriweke lexi Pawulo a xi tsaleleke Vakreste va Vaheveru lava tshembekaka, hilaha xi rhekhodiweke hakona eka Vaheveru 13:20, 21.