Bokisi Ra Swivutiso

◼ Hi wahi makhombo ya ku tirhisa Internet ku bula ni munhu loyi hi nga n’wi tiviki?

Ti-Web-site to tala ti endleriwe leswaku vanhu va hlangana eka tona kutani va burisana hi ku tirhisa Internet. To tala ta ti-Web-site leti ti pfumelela vanhu leswaku va hoxa rungula ra vona vini, leri nga ha katsaka swifaniso ni rungula rin’wana ra munhu hi yexe. Kutani vanhu lava nga ta hlaya rungula rero va nga sungula ku tsalelana na wena. Vantshwa va ti tolovele ngopfu ti-Web-site to tano naswona vantshwa van’wana evandlheni va ti tirhisa leswaku va burisana ni van’wana lava tivulaka Timbhoni ta Yehovha.

Swa olova leswaku munhu loyi hi hlanganaka na yena eka Internet a hi xisa hi ku tivula hi vito leri nga riki rona, a nga hi byeli ntiyiso hi vumoya bya yena kumbe hi swikongomelo swa yena. (Ps. 26:4) Munhu la tivulaka Mbhoni ya Yehovha swi nga ha endleka a nga ri Mbhoni, a susiwile eku hlanganyeleni kumbexana a ri mugwinehi la lavaka ku hambukisa Timbhoni. (Gal. 2:4) Ku vikiwa leswaku vo tala lava pfinyaka vana va tirhisa ti-Web-site toleto ku kuma vana lava va nga va pfinyaka.

Hambiloko hi tibyela leswaku lava hi tsalelanaka na vona i Timbhoni ta ntiyiso, mabulo yo tano eka Internet ma nga ha hambuka hi ku olova, ma nghena eka swilo swa manyala. Leswi swi vangiwa hi leswi hakanyingi vanhu va rhetaka ririmi loko va bula ni vanhu lava va nga va tiviki hi xiviri. Nakambe va nga ha vona onge loko va bula eka Internet a va voni hi munhu naswona va vona onge xin’wana ni xin’wana lexi va xi vulaka a xi nge tiviwi hi van’wana vo tanihi vatswari va vona kumbe vakulu. Khombo ra kona, vantshwa vo tala lava nga emindyangwini ya Vakreste na vona va phasiwile naswona va katseke eka mavulavulelo ya nhlambha. (Efe. 5:3, 4; Kol. 3:8) Van’wana va hoxe ni swifaniso swa vona vini leswi pfuxaka ku navela ka rimbewu, kumbe va titivisa hi mavito ya nhlambha lawa va nga tithya wona kumbe va hoxa tivhidiyo ta vuyimbeleri bya manyala eka rungula ra vona.

Hikwalaho ka ku burisana loku nga kona hi ku tirhisa Internet, vatswari va fanele va va ni vuxiyaxiya eka leswi vana va vona va swi endlaka eka khompyuta. (Swiv. 29:15) Swi ni khombo ku rhamba xi-ta-xi-famba emutini wa hina kumbe ku xi siya ni vana va hina. Hilaha ku fanaka, swi ni khombo eka hina kumbe eka vana va hina ku endla vunghana ni swi-ta-swi-famba eka Internet, hambiloko swi tivula Timbhoni ta Yehovha.—Swiv. 22:3.