Chavelela Lava Nga Ni Gome
1 Hi hanya emasikwini lawa vanhu vo tala va lavaka nchavelelo. Loko hi landzela xikombiso xa Hosi ya hina Kreste Yesu, na hina hi ringeta ku chavelela “lava vavisekeke mbilu.”—Esa. 61:1.
2 Ndlela Yo Chavelela: Leswaku hi ta chavelela vanhu loko hi ri ensin’wini, swingheniso swa hina swi fanele swi va leswi khutazaka. Loko hi nga vulavuli ngopfu hi swiyimo swo biha swa misava leyi ni tidyondzo ta mavunwa, sweswo swi ta endla leswaku hi bula ngopfu hi ntiyiso wa Matsalwa ni hi switshembiso swa Xikwembu leswi chavelelaka. Leswi a swi vuli leswaku a hi nge buli hi Armagedoni. Ntirho wa hina i ku huwelela “lembe ra vunene ra Yehovha ni siku ra ku rihisela ka Xikwembu xa hina,” leswaku hi “lemukisa lowo homboloka endleleni yakwe yo homboloka.” Hambiswiritano, loko hi lemukisa vanhu hi Armagedoni ni ndlela leyi yi nga ta lovisa ha yona, a swi vuli leswaku mahungu lamanene ya Mfumo wa Xikwembu a hi ya nkoka.—Esa. 61:2; Ezek. 3:18; Mat. 24:14.
3 Hi Yindlu Ni Yindlu: Swi tolovelekile ku kuma vanhu lava nga ni gome hikwalaho ka vuvabyi, rifu, ku khomiwa hi ndlela yo biha kumbe ku pfumaleka ka mali. Tanihi vatekeleri va Kreste hi va “twela vusiwana” vanhu lava hi hlanganaka na vona ensin’wini. (Luka 7:13; Rhom. 12:15) Hambileswi hi hlayaka tsalwa rin’we kumbe mambirhi lama va chavelelaka eka xiphiqo lexi va nga na xona, hi fanele ku “hatlisa emhakeni yo twa,” hi ku nyika munhu nkarhi wa ku tiphofula. (Yak. 1:19) Loko hi rhanga hi ku va yingisela hi ta kota ku va chavelela.
4 Loko bulo ri ri karhi ri ya emahlweni hlawula nkarhi lowunene kutani u ku: “Ndzi rhandza ku ku hlayela marito yo karhi lama khutazaka lama humaka eBibeleni.” Tivonele leswaku u nga ringeti ku lulamisa nchumu wun’wana ni wun’wana lowu hoxeke lowu munhu loyi a nga wu vulaka. Kambe, xikongomelo xa wena xi fanele xi va ku khutaza ni ku chavelela munhu yoloye hi Matsalwa. U nga ha tirhisa buku leyi nge Ku Hlamulana Hi Matsalwa eka matluka 405-409, ehansi ka xihloko lexi nge “Xikhutazo.” Kumbe u nga ha n’wi nyika xiphephana lexi nge Nchavelelo Eka Lava Nga Ni Gome kutani mi bula hi rungula leri khutazaka leri kumekaka eka xona.
5 Lava Tindlela To Chavelela Van’wana: Xana ku ni muakelani, mutirhi-kuloni, mudyondzi-kuloni kumbe xirho xa ndyangu lexi lavaka ku chaveleriwa? Swi ta va swinene ku va endzela emakaya ya vona leswaku u ta va chavelela hi Matsalwa. Loko u tiva leswaku i yini leswi va karhataka swi ta ku pfuna ku lunghiselela Matsalwa lama faneleke. Van’wana va endla tano hi ku tsala mapapila kumbe ku ba riqingho. Loko hi rhandza vaakelani va hina hakunene hi ta va twela vusiwana ni ku va chavelela hi Matsalwa.—Luka 10:25-37.
6 Ntirho wa hina i ku chavelela lava nga ni gome ni ku endla leswaku va va ni ntshembo hi vumundzuku. Lowu hi wona nchavelelo lowu vanhu emisaveni hinkwayo va wu lavaka. Vanhu va timbilu letinene va ta chaveleleka ni ku va ni ntshembo loko hi bula na vona hi tsakile hi swilo swo tala leswinene leswi Xikwembu xi hi tshembisaka swona. Onge hi nga tshama hi ri karhi hi tsundzuka leswaku hi fanele ku chavelela lava nga ni gome.