Wu Tirhise Kahle Nkarhi Wa Wena Wo Chumayela
1 A swi kanakanisi leswaku swa ha tele leswi hi faneleke hi swi endla entirhweni wa hina wo chumayela kambe nkarhi lowu seleke wu komile. (Yoh. 4:35; 1 Kor. 7:29) Loko ho hlela swilo swa hina kahle ka ri emahlweni, hi ta kota ku wu tirhisa kahle nkarhi lowu hi wu vekeleke ku ya ensin’wini.
2 Tilunghiselele: Loko u nga si ya enhlanganweni wa ntirho wa nsimu, tiyiseka leswaku u na yona minkandziyiso leyi u nga ta yi fambisa nileswaku u xi lunghiselele kahle xingheniso lexi u nga ta xi tirhisa. Endzhaku ka loko nhlangano wu pfariwe hi xikhongelo, namba u ya ensin’wini. Leswi swi ta pfuna wena ni lava u fambaka na vona leswaku mi endla swo tala hilaha mi nga kotaka hakona hi nkarhi wa nsimu.
3 Loko u averiwe ku fambisa nhlangano wa ntirho wa nsimu, sungula hi nkarhi. Nhlangano wu nga tluli timinete ta 15. Loko lava yaka ensin’wini va nga si hangalaka, tiyiseka leswaku va swi tiva leswaku va famba na vamani nileswaku va ya tirha kwihi.
4 Loko U Ri eNsin’wini: Loko nhlangano wa ntirho wa nsimu wu hela, mi nga dyi mabulo mi nga heti kambe namba u kongoma ensin’wini. Loko u tiva leswaku u ta hatla u muka, swi nga va swinene ku hlela leswaku loyi u tirhaka na yena a kuma munhu loyi a nga ta sala a tirha na yena. Loko mi tirha tanihi ntlawa, u fanele u anakanyela lava ku yimeleke leswaku va nga rindzi nkarhi wo leha. Leswi swi nga ha lava leswaku u tsema bulo hi vutlhari loko n’wini wa muti a lava ku phikizana na wena, kumbe u kombela ku vuya eka lava tsakelaka.—Mat. 10:11.
5 Loko u endla maendzo yo vuyela, papalata ku famba mpfhuka wo leha hi ku endzela vanhu lava tshamaka endhawini yin’we u nga si ya eka yin’wana. Loko swi koteka, u nga ha va bela riqingho leswaku u tiyiseka loko va ta va va ri kona ekaya. (Swiv. 21:5) Loko u tiva leswaku u ta tshama nkarhi wo leha endlwini yo karhi, u nga ha byela lava u fambaka na vona leswaku va chumayela etindlwini leti nga ekusuhi kumbe va endla maendzo man’wana yo vuyela.
6 Hi hanya enkarhini wa ntshovelo lowukulu wa vanhu. (Mat. 9:37, 38) Ntirho lowu wu ta hela ku nga ri khale. Hikwalaho, hi fanele hi tiyimisela ku wu tirhisa kahle nkarhi wa hina wo chumayela.