Hinkwerhu Hi Ni Swo Karhi Leswi Hi Nga Swi Nyikaka Yehovha
1 Xana a wu swi tiva leswaku vanhu va nga swi kota ku nyika Xikwembu swo karhi? Avele, Nowa na Yobo va endlele Yehovha switlhavelo hi swifuwo swa vona swa risima. (Gen. 4:4; 8:20; Yobo 1:5) Switlhavelo sweswo a swi endlanga leswaku Muvumbi a fuwa, tanihi leswi a nga ni swilo hinkwaswo. Kambe switlhavelo sweswo swi kombise leswaku vavanuna volavo vo tshembeka a va xi rhandza hi mbilu hinkwayo Xikwembu. Namuntlha hi nga tirhisa nkarhi wa hina, matimba, mali ni swilo swa hina leswaku hi nyika Yehovha “xitlhavelo xa ku dzunisa.”—Hev. 13:15.
2 Nkarhi: Swa bumabumeriwa swinene ku ‘tixavela’ nkarhi hi ku tshika ku endla swilo leswi nga riki swa nkoka leswaku hi ta hlanganyela hi xitalo evutirhelini! (Efe. 5:15, 16) Kumbexana hi nga cinca xiyimiso xa hina leswaku hi va maphayona ya nkarhinyana n’hweti yin’we kumbe to hlayanyana hi lembe. Hi nga ha engetela ni nkarhi lowu hi ntolovelo hi wu hetaka hi ri ensin’wini. Loko ho engetela timinete ta 30 vhiki rin’wana ni rin’wana, loko n’hweti yi hela hi nga tikuma se hi tirhe tiawara timbirhi leti engetelekeke.
3 Matimba: Leswaku hi kota ku tirha nkarhi wo leha ensin’wini, swi lava hi papalata vuhungasi ni ntirho lowu hi siyaka hi karhele swinene lerova hi nga ha swi koti ku tirhela Yehovha hi matimba ya hina hinkwawo. Nakambe hi fanele hi papalata ku vilela hi swilo leswi nga hi ‘tshovaka’ timbilu, swi hi heta matimba lawa a hi ta ma tirhisa entirhweni wa Xikwembu. (Swiv. 12:25) Hambiloko hi ri ni xivangelo lexi twalaka xo vilela, i swinene ngopfu ku ‘lahlela ndzhwalo wa hina eka Yehovha.’—Ps. 55:22; Filp. 4:6, 7.
4 Mali Ni Swilo Swa Hina: Hi nga ha nyikela hi mali ni hi swilo swa hina leswaku hi seketela ntirho wo chumayela. Pawulo u khutaze Vakreste-kulobye leswaku minkarhi hinkwayo va ‘veka swo karhi etlhelo’ leswaku va ta va ni swo karhi swo swi nyika lava pfumalaka. (1 Kor. 16:1, 2) Hilaha ku fanaka, hi nga swi kota ku veka mali leyi hi nga ta nyikela ha yona eka swilaveko swa vandlha ni le ka ntirho wa misava hinkwayo. Yehovha u swi tlangela swinene leswi hi n’wi nyikaka swona hi mbilu hinkwayo, hambiloko swi ri switsongo.—Luka 21:1-4.
5 Yehovha u hi nyike swilo swo tala. (Yak. 1:17) Hikwalaho, loko hi nyikela hi nkarhi, matimba, mali ni hi swilo swin’wana swa hina hi malwandla entirhweni wakwe hi kombisa leswaku ha tlangela. ‘Xikwembu lexi rhandza munyiki la tsakeke,’ xa tsaka loko hi endla tano.—2 Kor. 9:7.