Hambetani Mi Akana Loko Mi Ri eNsin’wini
1 Hinkwerhu ka hina ha swi tlangela ku twa “rito leri vuriweke hi nkarhi wa kona.” (Swiv. 25:11) Loko hi tirha nsimu ni van’wana, xana hi nga endla njhani leswaku mabulo ya hina ma va lama khutazaka?
2 Mabulo Lama Akaka: Hakunene swa aka ku bula hi timhaka ta moya loko hi ri entirhweni wo chumayela! (Ps. 37:30) Hi nga ha vulavula hi tinkulumo ta hina kumbe hi rungulelana mintokoto ya le nsin’wini leyi ha ha ku hlanganaka na yona. (Mint. 15:3) Xana ku na swo karhi leswi hi nga swi kuma loko hi tihlayela Bibele, timagazini kumbe loko hi ri eka nhlangano wun’wana wa vandlha? Hi nga ha bula hi tinhla leti hi nga ti twa eka nkulumo ya le rivaleni leyi ha ha ku yi twaka eHolweni ya Mfumo.
3 Hi nga titwa hi hele matimba loko n’wini wa muti a vutisa xivutiso lexi hi tsandzekaka ku xi hlamula. Swi nga hi pfuna leswaku loko hi huma emutini wolowo hi bulanyana ni loyi hi fambaka na yena hi ndlela leyi hi nga xi hlamulaka ha yona enkarhini lowu taka xivutiso xa kona, kumbexana hi tirhisa buku leyi nge Ku Hlamulana. Loko loyi hi fambaka na yena a tirhise xingheniso xa kahle, swi ta n’wi khutaza loko hi n’wi bumabumela.
4 Teka Goza Ku Sungula: Eka dyondzo ya n’wina ya buku ya vandlha, xana va kona lava u nga siki tirhaka na vona nsimu sweswinyana? Ku kombela munhu wo karhi leswaku a famba na hina ensin’wini swi nga ha endla leswaku ‘hi khutazana.’ (Rhom. 1:12) Maphayona ya nkarhi hinkwawo ni ya nkarhinyana ma tsaka loko ku ri ni lava va humaka na wona nsimu, ngopfu-ngopfu ni mixo swinene kumbe nimadyambu, loko ku nga ri na vahuweleri vo tala lava nga ta huma nsimu. Hi nga seketela maphayona hi ku huma na wona nsimu. Xana ku ni muhuweleri loyi rihanyo rakwe ri n’wi endlaka a nga koti ku huma nsimu kahle? Ku hlela ku famba ni muhuweleri wo tano eka loyi hi dyondzaka na yena Bibele swi nga ha n’wi pfuna.—Swiv. 27:17.
5 Minkarhi hinkwayo ku bumabumela ni ku tlangela swa khutaza, hambi ku ri eka timhaka leti nga nyawuliki. Tshama u ri karhi u tsundzuka ku endla tano, loko u tirha ni van’wana ensin’wini, hikwalaho ka leswi hi lavaka ku ‘hambeta hi akana.’—1 Tes. 5:11.