Bokisi Ra Swivutiso

◼ Xana swi fanerile leswaku vayingiseri va ba mavoko endzhaku ka nkulumo yin’nwana ni yin’wana eka Xikolo xa Vutirheli bya le Tilweni ni le ka Nhlangano wa Ntirho?

Loko Yehovha la nga Muvumbi a vumba misava ‘tinyeleti ta nimixo ti huwelele hi ntsako, ni vana va Xikwembu hinkwavo va huwelele va dzunisa.’ (Yobo 38:7) Vana lava va Xikwembu lava nga tintsumi va navele ku dzunisa Yehovha hikwalaho ka mintirho yakwe leyi hlamarisaka ya leswi a swi vumbeke, leyi a ku ri ndlela leyintshwa leyi a kombiseke vutlhari, vunene ni matimba yakwe.

I swinene leswaku na hina hi kombisa moya wa ku tlangela hi mbilu hinkwayo eka matshalatshala lama vamakwerhu va ma endlaka ni le ka tinkulumo leti va ti nyikelaka. Hi xikombiso, hi ntolovelo etinhlengeletanweni ni le mintsombanweni loko ku hela tinkulumo hi ba mavoko. Hi ya ba endzhaku ka loko xivulavuri xi hete nkulumo ya xona, ku nga ri loko xa ha sungula. Vamakwerhu va endle matshalatshala ni ku heta nkarhi wo tala va ri karhi va lunghiselela swiavelo sweswo hinkwaswo. Hikwalaho loko hi ba mavoko hi kombisa ku tlangela ku tikarhata ka xivulavuri ni ku tlangela Yehovha hikwalaho ka ndzetelo lowu a hi nyikaka wona hi ku tirhisa Rito ni nhlengeletano yakwe.—Esa. 48:17; Mat. 24:45-47.

Xana swi fanerile ku ba mavoko endzhaku ka nkulumo yin’wana ni yin’wana leyi nyikeriwaka eka Xikolo xa Vutirheli bya le Tilweni ni le ka Nhlangano wa Ntirho? A ku na milawu leyi sivelaka ku endla sweswo loko ku ri ndlela ya ntumbuluko yo kombisa ku tlangela, tanihi loko xichudeni xi heta ku nyikela nkulumo ya xona yo sungula exikolweni. Hambiswiritano, ku ba mavoko swi nga ha tshuka se swi va mukhuva naswona swi nga ha vi na xikongomelo. Hikwalaho a hi bi mavoko loko ku hela xiavelo xin’wana ni xin’wana kumbe loko ku vuriwe nhlayo ya lava a va ri kona eHolweni ya Mfumo.

Hambiloko hi nga bi mavoko endzhaku ka nkulumo yin’wana ni yin’wana eka Xikolo xa Vutirheli bya le Tilweni ni le ka Nhlangano wa Ntirho, ku ni tindlela tin’wana leti hinkwerhu ka hina nga kombisaka ha tona ku tlangela ndzetelo ni matshalatshala ya lava veke ni swiavelo swo karhi. Sweswo hi nga swi endla hi ku tshama hi xalamukile ni ku rhiya ndleve loko swi vulavuri swi nyikela tinkulumo. Kutani endzhaku ka nhlangano, hi nga ya eka makwerhu yoloye hi ya nkhensa matshalatshala yakwe.—Efe. 1:15, 16.